Búgin oblys ákimi Nurlybek Nálibaev Qyzylorda qalasyndaǵy Jalańtós bahadúr kóshesiniń boıynda ornalasqan «Shuǵyla» sport kesheniniń saltanatty ashylý rásimine qatysty. Aımaq basshysy turǵyndardy quttyqtap, sport salasyndaǵy jetistikterge toqtaldy.

«Ótken jyly aımaqqa arnaıy saparmen kelgen Memleket basshysy Qasym-Jomart Kemeluly jas sportshylarmen kezdesýinde «Sportpen shuǵyldaný kerek. Ásirese, ózderińiz sıaqty jastarymyzdyń deni saý, myqty azamat bolyp ósýi qajet. Jastardyń deni saý bolsa, memleket te qýatty bolady» degen edi. Sport eldiń mereıin tasytyp, jeńimpazdyq rýh syılaıdy, jastardy tabandylyqqa, tártipke baýlıdy.

Prezıdentimizdiń, Úkimettiń qoldaýynyń arqasynda óńirler arasynda kóshbasshylar qatarynan kórinip kelemiz. «Jaıly mektep» ulttyq jobasy aıasynda
12 300 orynǵa arnalǵan 21 mektep salynýda. Byltyr 10 mekteptiń qurylysy bastalsa, bıyl taǵy 11 mekteptiń qurylysy júrgiziledi. «Aýyldyq densaýlyq saqtaýdy jańǵyrtý» ulttyq jobasy aıasynda ótken jyly eldi mekenderde 15 jańa dárigerlik ambýlatorıa,
1 medısınalyq beket el ıgiligine tabystaldy.

Sporttyq nysandar qurylysy da qarqyn aldy. Qyzylorda qalasynda quny
2 mlrd 700 mln teńge bolatyn ústel tenısi ortalyǵynyń qurylysy júrýde. Syrdarıanyń sol jaǵalaýynan halyqaralyq standarttarǵa saı, jabyq baseıni bar kópsalaly dene shynyqtyrý-saýyqtyrý kesheniniń qurylysy bastaldy, 10 myń oryndyq jańa stadıonnyń irgetasy qalandy. Byltyr 7 dene shynyqtyrý-saýyqtyrý kesheni el ıgiligine tabystaldy, bıyl aýdandarda 15 keshendi qoldanysqa beremiz», – dedi aımaq basshysy.

  Rásimde jańa sport keshenin ashyp, jastar men jasóspirimder arasynda salaýatty ómir saltyn qalyptastyrýǵa úles qosqan «Nuraı» JSHS dırektory Seıitqalı Alshynbaev oblystyń eń joǵary nagradasy – Qurmet gramotasymen  marapattaldy.

İs-sharada memleket jáne qoǵam qaıratkeri Murat Baqtıaruly sóz sóılep, jerlesterin jańa nysannyń ashylýymen quttyqtady.

Sport kesheni 350 oryndyq, 1,7 mlrd teńgege salynǵan, jalpy aýdany – 2700 sharshy metr. Onda taekvondo, horeografıa, ústel tenısi, fýtbol, voleıbol, basketbol, qazaqsha kúres, shahmat, toǵyzqumalaq úıirmeleri bolady. Aýmaǵynda shaǵyn fýtbol alańy jáne avtoturaq bar.

Aıta keteıik, bıyl Syr sportshylary álemdik arenalarda óner kórsetip, oblys qorjynyna 54 medal salsa, respýblıkalyq chempıonattar men kýboktardan 245 júlde ıelendi. Basty jetistik – Qamshybek Qońqabaev bokstan, Aıdos Sultanǵalı grek-rım kúresinen Parıj olımpıadasyna, otyryp oınaý voleıbolynan qos birdeı sportshymyz Erık Qasqabaev pen Shyńǵys Medeýov paralımpıadaǵa joldama aldy. Dzúdo, paradzúdodan da  úmitkerler bar.