Búgin Taraz qalasynda «Taza Qazaqstan» aksıasy aıasynda kanaldar men aryqtar tazalanýda dep habarlaıdy Qamshy.kz aqparat agenttigi. 

500-den astam eriktiler men belsendi jastar jáne qala turǵyndary qatysqan aksıa «Densaýlyq» saıabaǵyndaǵy «Qarasý-2» kanalynyń jaǵalaýynda ótti.

«Taza Qazaqstan» aksıasy bastalǵannan beri Jambyl oblysynda 816,6 shaqyrym kanal men aryq qoqystardan tazartylǵan. Bul jumystarǵa eriktiler, jastar, turǵyndar qatysty.

Búginde Taraz qalasyndaǵy «Qapal», «Úshbulaq», «Qarasý-1», «Qarasý-2», «Tóregeldi» kanaldaryn mehanıkalyq tazalaý jumystary júrgizilýde. Aǵymdaǵy jyldyń sońyna deıin 300 shaqyrymǵa jýyq kanaldar men aryqtar tazartylatyn bolady.

Buǵan deıin aımaq basshysy oblys ortalyǵyndaǵy sý kanaldary men aryqtardyń jaı-kúıimen tanysyp, keshendi tazalaýdan ótkizý boıynsha qala basshylyǵyna naqty mindetter júktegen bolatyn.

Soǵan sáıkes, qazirgi tańda 6 kanalda mehanıkalyq tazalyq jumystary bastalyp úlgerdi. Jalpy,  bıyl qaladaǵy 8 kanal tazalaýdan ótedi.

- Taraz qalasyndaǵy kanaldardyń tazalyǵy nazardan tys qalǵan emes. Bul jumystar «Taza Qazaqstan» aksıasy aıasynda qaıta jandana tústi. Men turatyn  «Qarasý» shaǵyn aýdanyndaǵy jaǵalaý qalamyzdyń kórikti jerleriniń birine aınalyp keledi. Buryn qamys pen qoǵa basyp jatqan aımaq búginde taldar egilip, gúlmen kómkerilgen kórikti mekenge aınaldy. Keshkisin otbasymyzben shyǵyp, osynda serýendeýdi dástúrge aınaldyrdyq, -deıdi qala turǵyny Baqytjan Toqbolatov.