Ádilet mınıstri Azamat Esqaraev úkimet janyndaǵy memlekettik til saıasatyn iske asyrý jónindegi komısıasynyń otyrysynda "Memlekettik tilde zań ázirleý máselesi" boıynsha baıandama jasady.

Mınıstr baıandamasynda norma shyǵarý qyzmetinde qazaq tilin odan ári damytý maqsatynda normatıvtik quqyqtyq aktilerdiń jobalaryn orys tiline aýdarýdy qamtamasyz ete otyryp, olardy qazaq tilinde ázirleý mindetin kezeń-kezeńimen zańnamalyq bekitý múmkindigin pysyqtaý mindeti kózdelgenin aıta otyryp, mınıstr til máselesine baılanysty eki baǵytqa toqtalyp ótti.

"Birinshi baǵyt – termınologıa máselesin sheshý. Zańnamalyq aktilerdiń mátinine qoıylatyn talaptardyń biri – bul termınderdiń birizdiligi. Respýblıkalyq termınologıalyq komısıa bekitken termınder usynymdyq sıpatqa ıe. Sondyqtan is júzinde, komısıa maquldaǵannan keıin de, zańgerler men fılologtar arasynda bir termındi ártúrli etip aýdarý tóńireginde pikirtalastar jıi bolady. Sondyqtan qazaqsha termınologıalyq sózdikterge resmı mártebe berý jáne olardy norma shyǵarý prosesinde qoldaný qajet ekenine toqtaldy”, – deıdi.

Al ekinshi baǵyt – tıisti uıymdastyrýshylyq sharalardy qabyldaý. Búginde zań jobalaryn memlekettik tilde ázirleý boıynsha mamandardan zańgerlerden jáne ǵalymdardan qurylǵan pýl tizimi qalyptasqany jáne bolashaqta sol mamandardy zań jobalaryn ázirleý prosesine tartý qajet ekeni aıtylǵan.

Ádilet mınıstri qazaq tilinde zań jazýǵa, normatıvtik qujattardy túzeýge "ıkemsiz" degen túsinikten arylyp, memlekettik tildiń mol múmkindigin keńinen paıdalaný qajet ekenin atap ótken. Aldaǵy ýaqytta birlesip atqarar jumystarda aıqyn nátıjelerge qol jetkizetinine senimin bildirgen.