Elimizde "Ónegeli urpaq" aksıasy jalǵasyp jatyr. Búgin 1 mamyr - Birlik kúnine oraı jáne atalǵan naýqan aıasynda Qonaev qalasynyń ákimi Asqat Berdihanov jalǵyzbasty ananyń úıine baryp qaıtty. Bul týraly Qonaev qalasynyń baspasóz qyzmeti habarlady. 

Ákim Qonaev qalasynda turatyn 90 jastaǵy Valentına ájeniń hal-jaǵdaıyn surap qaıtqan. Birneshe jyl buryn ájeıdiń jary qaıtys bolǵan. Valentına ájeı otbasymen birgen 1974 jyly Qonaev qalasyna kóship kelgen. Qazirgi tańda zeınetker ájeıdiń kúıeýi Qapshaǵaı SES-ta energetık bolsa, ózi ınjener-qurylysshy bolyp qyzmet atqarǵan. Al ekinshi dúnıejúzilik soǵys kezinde tyl eńbekkeri bolǵan. Ájeıdiń jalǵyz uly bar. Alaıda ol óz enshisin alyp, ájeıden bólek turady. Al Valentına Marýshenko osy jerden kóshkisi kelmeıtinin, áleýmettik qyzmetkerler únemi kómektesip júretinin aıtady. El arasynda otyrǵan soń únemi izdep kelip, qolǵanat bolǵan áleýmettik qyzmetkerlerge rıza ekenin málimdedi. 

Úlkenge qurmet, kishige izet kórsetý kóneden kele jatqan salt-dástúrimiz. Osy oraıda shahar basshysy Valentına Marýshenkoǵa gúl syılap, azyq-túlik sebetin de tabystady. Ájemen birge aýlaǵa aǵash ekti. Jas eriktiler de is-sharadan tys qalmaı, úıdiń aýlasyn qoqystan tazartyp, shóbin julyp, tazalyq jasady. Bundaı is-sharalar óskeleń urpaqty rýhanı qundylyqtarǵa baýlýda úlken ról atqarady. Áje halin suraýǵa kelgenderge aq batasyn berip, alǵysyn aıtty.