Almaty qalasynda "Qaryzsyz qoǵam" jobasy aıasynda 12 myń qala turǵynyn qarjylyq saýattylyqqa oqytatyn bolady. Almatyda joba 2024 jyldyń 5 aqpanynan bastap júzege asyp keledi. Bul aqparatty Almaty qalasynyń Óńirlik komýnıkasıalar qyzmetiniń alańynda jobanyń bastamashylary habarlady. 

"AMANAT" partıasy iske qosqan "Qaryzsyz qoǵam" jobasy problemalyq kredıtter men qaryzdar saldarynan qıyndyqtarǵa tap bolǵan qazaqstandyqtardy qoldaý maqsatynda ótip jatyr. "Qaryzsyz qoǵam" jobasy bastalǵannan beri qalanyń 3500 turǵyny óz qarjysyn basqarýdy, qaryz shyrmaýynan shyǵýdy úırendi. Almatyda joba 2024 jyldyń 5 aqpanynan bastap qalalyq ákimshilikpen birleske túrde, ár aýdanda jeke júzege asyrylyp jatyr.

"AMANAT" partıasynyń Almaty qalalyq fılıaly tóraǵasynyń orynbasary Qýanysh Tólepov Memleket basshysy óziniń Qazaqstan halqyna Joldaýynda jobanyń mańyzdylyǵyn jáne ony elimizdiń barlyq óńirlerinde keńeıtý qajettigin atap ótti.

"Bıyl joba boıynsha elimizdiń barlyq óńirinde 200 myń adamdy, onyń ishinde Almaty qalasynyń 12 myń turǵynyn oqytý josparlanyp otyr. Qazirgi ýaqytta qala ákimdigimen birlese qalamyzdyń 6 meken-jaıy boıynsha oqytý ótkizilýde. Almaty qalasyna 6 qarjy sarapshysy bekitilgen. Olar túske deıin jalpy baǵdarlama, tústen keıin qatysýshynyń qalaýy boıynsha jeke keńester beredi. Joba qalanyń 8 aýdanyn qamtıdy. Oqytý 5 kún bolady. Osy ýaqyt ishinde qatysýshylar otbasylyq búdjetti júrgizýdi, shyǵyndaryn basqarýdy, nesıelik qaryzdardy merziminen buryn óteý boıynsha usynystar alýdy, tıimdi sharttarmen nesıe tańdaýdy, depozıtterdiń ártúrli sharttarymen tanysýdy, iri satyp alýlardy josparlaýdy úırenedi", - dedi Q.Tólepov.

Joba bastalǵannan beri qazirgi ýaqytqa deıin 11 ret oqytylyp, barlyǵy 3500-den astam qatysýshy qarjylyq saýattylyq boıynsha bilimin arttyrdy. 

Oqytý barysynda qarjy sarapshylary jeke konsýltasıalar ótkizedi jáne qatysýshylardyń qalaýy boıynsha óz bıznesin ashý úshin memlekettik granttyq jáne kredıttik baǵdarlamalarǵa bıznes-jospar jazýǵa kómektesedi. Joba aıasynda qatysýshylar zańger kómegine de júgine alady. Zańgerler  shottaryna tyıym salynǵan, qaryzdary kolektorlyq kompanıaǵa satylǵan jaǵdaıda nemese nesıelik qaryzdy qaıta qurylymdaý boıynsha turǵyndarǵa kómek kórsetedi. Qazirgi tańda bir topta 100 adamǵa deıin kýrstan ótip jatyr.

"Qaryzsyz qoǵam" jobasy qaryzǵa belsheden batyp, úmitin úzgenderge naqty qoldaý kórsetedi. Joba qolda bar qarajatqa ómir súrýge, qajetsiz nesıeden bas tartýǵa úıretedi. Bárin osy jobaǵa qatysyp, óziniń qarjylaı saýattylyǵyn arttyrýǵa shaqyramyn", - dedi Q.Tólepov bıfıngte.

Oqytý barysynda azamattar qaryz qursaýynan shyǵyp, qarjysyn durys basqarýdy úırenedi. Bul óz kezeginde qoǵamdaǵy jalpy ekonomıkalyq turaqtylyqty jaqsartýǵa yqpal etedi dep kútilip otyr.

Tegin kýrstar men oqýdan ótýge nıet bildirýshiler turǵylyqty jeri boıynsha "AMANAT" partıasynyń aýdandyq fılıalyna nemese aýdan ákimdikterine júgine alady. Qatysýshylarǵa yńǵaıly bolý úshin onlaın platforma da iske qosylǵan.