9 maýsymda jazýshy Tólen Qaýpynbaevtyń úsh tilde jaryq kórgen «Raıymbek batyr» kitabynyń tusaýy kesildi. Kitap «Tamos Education» JSHS qoldaýymen jaryq kórdi.

Búkil álem Raıymbek babany tanysyn dedik

Dáýren Qaýpynbaev Qazaqstandaǵy eń iri jekemenshik mektepter jelisi TAMOS Education men PrometheusSCHOOL negizin qalaýshysy:

«Raıymbek babamyz búkil qazaq halqynyń batyry ǵana emes, ol áýlıe-ánbıe, zamanaýı tilmen aıtqanda kóripkel-ekstrasens te bolǵan. Tarıhta alǵash ret pontondy ótkeldi turǵyzyp, eki qazaq áskerin biriktirgen azamat. Urysta «Raıymbek! Raıymbek!» dep urandatqandardyń rýhy oıanyp, jeńiske degen senimi artqan. Áli kúnge deıin batyr babaǵa taǵzym etip keletinder qanshama. Raıymbektyń jatqan jerine baılanysty halyq arasynda keń taralǵan ańyz bar. Oǵan sensek, batyr túıe toqtaǵan jerden topyraq buıyrǵanyn qalaǵan. Keńes ókimeti kezinde batyrdyń qabirindegi tasty buzý týraly sheshim qabyldanǵan bolatyn. Biraq tehnıka ózdiginen buzylyp, adamdar qurylys alańynan qashyp tas ornynda qaldy. Keıin aqsaqaldar hat jazyp tasty ornynda qaldyrýdy talap etken.

«Raıymbek batyr» kitaby – ákem Tólen Qaýpynbaevtyń uzaq muraǵattyq jáne kitaphanalyq zertteýleriniń nátıjesi. Buryn jaryq kórgen týyndysyn zamanǵa saı óńdedik. Sosyn rys jáne aǵylshyn tilderine aýdardyq. Osylaısha álemniń batyr babamyzdy tanýynamuryndyq bolamyz degen úmittemiz».

Eldana Qaýpynbaeva Kýıglı «Raıymbek batyr» kitabynyń aǵylshynsha nusqasynyń redaktory:

«Ákem tiri kezinde búkil Qazaqstandy aralap shyqqan qazaqtyń qarapaıym qara domalaq balasy edi. Eseıe kele jýrnalıs, odan keıin jazýshy retinde ósken, arhıv pen shet-shettegi aýyldardy aralap Qazaqstannyń túkpir-túkpirinde turatyn qara buqara halqymyzdyń qarıalarynyń jadyndaǵy este qalǵan shejirelerin qaǵazǵa túsirgen zertteýshi edi. 70-shi jyldary Jalaıyr rýynyń shejiresin shyǵarǵan. 80-shy jyldary Alban shejiresin jınaqtady. Nurbapa Ómirzaqov, Shoqan Ýálıhanov, Muqaǵalı Maqataev, Raıymbek batyr sıaqty tulǵalar týraly ǵylymı zertteý jasap kitap qylyp oqyrmanǵa usyndy. Amerıkada júrip baıqaǵanym, kitaphanalarda qazaqtyń tarıhynan, batyr babalarymyzdyń ómirinen syr shertetin kitap joqtyń qasy. Osy kezekte ákemniń týyndysyn aǵylshynǵa aýdaryp, álemdik oqyrmanmen qaýyshýyna sebep bolǵym keldi».

Tólen Qaýpynbaev kóshpeli ensıklopedıst bolǵan

Beıbit Sarybaı Jazýshy, satırık:

«Tólen Qaýpynbaevtyń ereksheligi – derekkózderi aýyl-aýyldy aralap, aqsaqaldarmen tildesip jazyp alyp sonyń bárin ǵylymı aınalymǵa engizgeni. Bala kezimizde talaı ret munyń kýágeri atandyq. Ol kisi daýylǵa da, jaýynǵa da qaramastan avtobýsqa minip alyp derek jumysymen aýylǵa bet alatyn. 2004 jyly jarıalanǵan Almaty oblsynyńensıklopedıasyndaǵy kóptegen málimet Tólen Qaýpynbaevtyń jaıaý júrip jınaǵan derekteri. Sondyqtan ony Jetisý aımaǵynyń tarıhyn hatqa túsirgenderdiń biregeıi deýge negiz bar».