2024 jylǵy 1 maýsymdaǵy jaǵdaı boıynsha Memlekettik áleýmettik saqtandyrý qorynan jumysynan aıyrylýyna baılanysty áleýmettik tólem alýshylardyń sany 162,6 myń adam boldy.
Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady. 

"Bul rette bıyl 110,3 myń adamǵa tólem alǵash ret taǵaıyndaldy. Tólemderdiń jalpy somasy 31,8 mıllıard teńge boldy. Qoldanystaǵy zańnama boıynsha, jumystan bosatylǵan jumyskerler mindetti áleýmettik saqtandyrý júıesine qatysý ótiline jáne keıingi 24 aıdaǵy tabysyna baılanysty bir aıdan alty aıǵa deıin jumysynan aıyrylýy boıynsha áleýmettik tólemder alady. Tólem joǵalǵan kiristiń 45%-yna deıingi mólsherde MÁSQ qarajaty esebinen júzege asyrylady", – delingen habarlamada. 

Tólem taǵaıyndaý úshin jumystan bosatylǵan jumyskerge:

eGov.kz portalynda avtorızasıalaný;
«Jumysqa ornalastyrý jáne jumyspen qamtý» bóliminde «Jumys izdeýshi adamdardy tirkeý» qyzmetin tańdaý;
onlaın-qyzmetke tapsyrys berip, barlyq joldy toltyrý jáne oǵan ESQ-men qol qoıyp, ótinimdi jiberý qajet;
bir kún ishinde turǵylyqty jerińizdegi mansap ortalyǵy (budan ári – MO) bos jumys oryndaryn usynady;
eger jumys tabylmasa, úsh jumys kúni ishinde qashyqtyqtan jumyssyz mártebesi beriledi (qajet bolǵan jaǵdaıda sizge MO qyzmetkeri qosymsha aqparat jınaý úshin habarlasady);
Bul qyzmetti onlaın rejıminde elektron eńbek bırjasy (enbek.kz) arqyly da alýǵa bolady.

Jumyssyz retinde tirkelý týraly málimetter bolǵan kezde Eńbek mınıstrliginiń aqparattyq júıesi proaktıvti formatta MÁSQ-ten tólemdi taǵaıyndaý boıynsha qyzmet kórsetýge kelisý úshin mobaıl telefonǵa SMS-habarlama jiberedi.
Kelisken jaǵdaıda SMS-habarlamaǵa jaýap berý qajet. Tólem avtomatty túrde taǵaıyndalady.