Áleýmettik jelide kıiz úıdiń ishinde bılegen jastardyń vıdeosy tarap, el narazylyǵyn týdyrdy. Atalmysh vıdeonyń avtory Álisher esimdi jigit óz áreketinen eshqandaı oǵashtyq kórmegenin aıtty.

«Osy beınejazbamdy jarıalaǵan soń, jurt kóp heıt pikirler jaza bastady. Ózim qazaq bolǵan soń, Qazaqstanda, Almatyda turǵan soń, áke-sheshem qazaq bolǵan soń, bul qadamnyń óte batyl sheshim ekenin aıta alamyn. Buny «ulttyq qundylyqtardy qorlaý» dep sanamaımyn. Bunyń ózinde ıronıa bar. Shyǵarmashylyq adamdaryn jaı adamdar uǵa bermeıdi. Olardyń álemi basqa. Táýekelge barmaı, batyl bolmaı, jańalyq ashylmaıdy», – dep pikir bildirgen ol óziniń paraqshasynda.

Beınejazbaǵa qatysty Mádenıet jáne aqparat mınıstri Aıda Balaeva pikir bildirdi. 

«Mundaı kontent qoǵamda alaýyzdyq týdyrýy múmkin. Arandatýshylyqqa da uryndyrýy yqtımal. Árıne, óskeleń urpaq tárbıesine keri áserin tıgizedi. Vıdeonyń mazmuny qazaq halqynyń qundylyqtary men salt-dástúrlerine qaıshy keledi. Taǵy bir másele óte mańyzdy. Memlekettik áleýmettik tapsyrystar dástúrli qundylyqtarymyzdy saqtaý men nasıhattaýda erekshe jaýapkershilikti talap etedi. Ulttyq qundylyqtardan bas tartý mádenıetimizge, salt-dástúrimizge jáne ádet-ǵuryptarymyzǵa qashan da qaýip tóndiredi. Al birligimiz ben turaqtylyǵymyzdyń myzǵymas negizin saqtaý – ortaq paryzymyz» dep jazdy Aıda Balaeva

Ol sondaı-aq medıa-proseste júrgen barsha adamdardy kontent jasaýda muqıat bolýǵa shaqyrdy. 

«Kez kelgen shyǵarmashylyq jumysta ulttyq salt-dástúr men qundylyqtardy qurmetteýge basymdyq tanytý kerek. Judyryqtaı jumylyp, birlese jumys istep qana halqymyzdyń basyn biriktirip, bólshekteýge bolmaıtyn baı mádenı muramyzdy saqtap qala alamyz» dedi ol feısbýk paraqshasyna.