Qaraǵandy oblysyndaǵy Taldy arheologıalyq kesheninen saq dáýirine tıesili qanjar tabyldy. Mundaǵy kóne oryndardy zertteý kezinde áshekeı buıymdar men qysh ydystar da kóptep shyqqan. 

Qaraǵandy oblysynyń Shet aýdanyndaǵy qazba jumystaryna qazir stýdent jastar da jumylyp jatyr.

– Qola dáýirine jatatyn Taldy men Aqkezeń qorymynda qazir qazba jumystary qyzý júrip jatyr. Baǵzy zaman adamdarynyń turaqtaryn qazý kezinde olardyń birinen saq dáýirine jatatyn temir qanjardy taýyp alǵan. «Shirimeı, pishini de sol kúıi saqtalǵan qarýdyń ıesi de osy jerde jerlenýi bek múmkin», – deıdi ǵalymdar. 

Arheologıalyq jumystarǵa 120 stýdent atsalysyp jatyr.

– Saq dáýirindegi «akınak» deıdi. Temir sol kúıi saqtalǵan. Adam jerlengen jerine túsken joq áli. Qazba jumystary jasalyp jatyr. Tabylǵan bul qanjar ólketaný mýzeıine tabystalatyn bolady. Osy arqyly týrıserge, qala turǵyndaryna usynylatyn bolady. Qazba jumystary kezinde qysh qumyra men ózge de áshekeıler tabylǵan. Al myna Qypshaq dáýirine jatatyn qorymnan tórt túlik súıekteri kóp shyqqan, – deıdi Eskertkishterdi qorǵaý ortalyǵy dırektorynyń orynbasary Janbolat Májıtov. 

Jalpy Taldy kesheninen 2016 jyly tabylǵan satyly «Saryarqa pıramıdasy» talaı arheologıalyq jańalyqtyń ashylýyna sebep bolyp otyr. Keıin zertteý nátıjesinde ekspedısıa músheleri bul aýmaqtan Beǵazy-Dándibaı mádenıetine jatatyn qala ornyn, qos at pen qysh ydystar qosa jerlengen kóne qorymdy anyqtaǵan edi. Tarıhı qorymdar búginde qalypqa keltirilip, týrıserdiń kóp keletin ornyna aınalǵan.

– Qypshaq dáýirine jatatyn taspen qorshalǵan aýmaqty qazýdamyz. Qorymdardyń salyný ereksheligi qypshaq kezeńiniń dástúr-tanymdaryna saı keledi. Negizgi sharýashylyǵy mal ósirý bolǵan. Usaq mal, jylqy súıekteriniń kóptep tabylýy da sodan, – deıdi «Saryarqa» arheologıalyq ınstıtýtynyń dırektory Alekseı Kýkýshkın.