Mańǵystaý oblysynyń prokýratýrasy ekonomıkalyq tergeý departamenti, sybaılas jemqorlyqqa qarsy qyzmet munaı kásiporyndarynda tekserý júrgizgen. "QazMunaıGaz" UK AQ enshiles kásiporny "OılTransportKorporeıshn" JSHS-niń laýazymdy tulǵalary taýar jetkizýshiden 1,5 mıllıard teńgeden astam somaǵa baǵasyna sáıkes kelmeıtin avtobýstardy alǵany anyqtaldy. Olar qunyn 400 mıllıon teńgege kóterip kórsetken.

Sondaı-aq jumys istemeıtin arnaıy tehnıka qyzmetteri úshin 110 mıllıon teńge aýdarǵany belgili boldy. Al "West Oil Software" JSHS-de jumys istemegenderge 400 mıllıon teńgeden astam jalaqy tólegen. Osylaısha kompanıa basshylyǵynyń jaqyn týystaryna negizsiz jalaqy eseptelip kelgen.

“Qylmystyq kodekstiń 189-babynyń 4-bóligi “Senip tapsyrylǵan bóten múlikti iri mólsherde berý nemese jymqyrý” boıynsha 5 sotqa deıingi tergeý bastaldy. Prosestik prokýrorlar taǵaıyndaldy. Sotqa deıingi tergep-tekserý sheńberinde atalǵan uıymdardyń 4 basshysy ustaldy. Qylmystyq ister oblystyq ekonomıkalyq tergeý departamentiniń óndirisinde”, – dep málimdedi Mańǵystaý oblysynyń prokýratýrasy.

Eske salaıyq, buǵan deıin “West Oil Software" kompanıasynyń jumysshylary bir aı boıy ereýilge shyqqan edi. 2023 jyldyń 11 jeltoqsanynda bas kótergen qyzmetkerler "QazMunaıGaz" Ulttyq kompanıasy" AQ quramyna qosylýdy, biryńǵaı jalaqy júıesin engizýdi jáne materıaldyq-tehnıkalyq bazany jańartýdy talap etken. 

Keıin Mańǵystaý oblysyndaǵy "West Oil Software" JSHS jumysshylarynyń ereýili zańsyz dep tanylǵan edi.  Al 28 qańtarda "West Oil Software" JSHS Mańǵystaý oblysyndaǵy ereýilge baılanysty 50 qyzmetkerdi jumystan shyǵarǵany belgili boldy.