Áleýmettik jelilerde Almatydaǵy Narhoz ýnıversıtetiniń qazaq tilinde bilim berýden bas tartqany týraly aqparat tarady. 

Bul týraly jýrnalıs Dıas Nuraqyn áleýmettik jelidegi paraqshasynda jazǵan. Jýrnalısiń aıtýynsha, oqý ornynyń eń negizgi tórt fakúltetiniń qazaqsha, oryssha toptary jabylǵan. 

“Almatydaǵy Narhoz ýnıversıteti qazaq tilinen bas tartypty. Oqý ordasyndaǵy eń negizgi degen tórt fakúltettiń qazaqsha, oryssha toptary jabyldy. Atap aıtqanda ekonomıka, qarjy, býhgalterlik esep, qarjylyq táýekel menedjment, bıznestegi aqparattyq tehnologıa mamandyqtary boıynsha bilim alamyn degender endi tek aǵylshynsha saıraýy kerek. Byltyr bul mamandyqtar boıynsha qazaqsha birde-bir top bolmaǵan. Bıyl da “qazaqtardy” qabyldamaımyz dep sheshim qabyldapty”, – delingen jazbada. 

Jýrnalıs ýnıversıtettiń bul áreketin qazaq tiline jasalǵan qastandyq dep sanaıdy. 

“Bul – baryp turǵan bassyzdyq. Qazaq tilin qurtýdyń tóte joly. Sebebi dúnıejúzi sóıleıtin tilde sabaq beremiz degen syltaýmen qazaq tilin tuqyrtyp otyr. NARHOZ-ǵa negizinen aýyl balalary kelip oqıdy. Aǵylshynshany emes, orysshany áreń túsinetin jastardyń sanasyn da, tilin de qoıyrtpaqtap jatyr deýge negiz bar. Bıylǵy quryltaıda prezıdent qazaq tilin meńgergender 70 paıyzdan asty dep aıtty. Al prezıdent ákimshiliginiń basshysy Aıbek Dádebaev qazaqsha sóıleıtinder sany 81 paıyzǵa teń dep suhbat bergeni esimizde. Endeshe qazaq elinde, qazaqtyń jerinde NARHOZ-dyń qazaqsha oqytpaımyz degeni qaı sasqany? Bul qazaqtardyń quqyǵyn taptaý emeı nemene?” – deıdi jýrnalıs. 

Jelide taraǵan aqparatqa qatysty ýnıversıtet basshylyǵy málimdeme jasady. 

“Narhoz ýnıversıtetindegi oqý josparyna sáıkes, stýdentter qazaq, orys nemese aǵylshyn tilderinde pánderdi tańdaıdy. Biz stýdentterge óz qalaýyn tańdaýyna jáne nazar aýdarýǵa múmkindik beremiz. Búginde kóptegen ýnıversıtet stýdentteri kóptegen pánderdi aǵylshyn tilinde oqýdy tańdaıdy. Óıtkeni aǵylshyn tilin jaqsy meńgerý olarǵa jahandyq bilim bazasyna qol jetkizýge múmkindik beredi. Qazir álemde ǵylymı bilimniń 90 paıyzdan astamy aǵylshyn tilinde shyǵarylady. Bul kózqaras ýnıversıtettiń tek Qazaqstanda ǵana emes, sonymen qatar shetelde de suranysqa ıe túlekterdi daıyndaýǵa baǵyttalǵan mısıasynan kórinedi”, – delingen ýnıversıtet habarlamasynda.