Maýsymda álemniń birqatar elderi qyzyq ári arqalaıtyn júgi aýyr kúndi atap ótedi. Ol úı sharýasynda otyrǵan áıelder men erkekter kúni. Bizdiń jaǵdaıymyzda kóbine úıde áıelder otyratyny belgili. Olaı bolsa, úıde otyrý áıel adamnyń ómirine, psıhologıasyna qalaı áser etetinin anyqtap kórdik.
Ǵalymdar adamnyń jumys istemeı, úıde otyrýyn mazasyzdyq pen streske dýshar etetin sebepterdiń biri retinde kórsetedi. Túrli zertteýler nátıjesinde jumyssyz adamda ózin baǵalaý deńgeıi tómen, depressıa deńgeıi joǵary keletini anyqtalǵan.
Psıholog Erjan Myrzabaev úıde otyrǵan áıelderdi turmystyń bitpeıtin tirligi fızıkalyq turǵydan sharshatatyn bolsa, qaıtalanyp jatqan kúnder men ártúrli ortamen qatynasqa túsý múmkindiginiń joqtyǵy psıhologıalyq turǵyda sharshatatynyn aıtady. Onyń sózinshe, úıde otyrýdyń áıel psıhologıasyna keri áseri onyń ashýshań, mazasyz bola bastaýynan, únemi melanholıa jaǵdaıynda júretininen ańǵarylady.
Mundaı kúıdegi qyz-kelinshekterdi “osy sen úıde ne istep sharshaısyń” dep abaısyzda aıtylǵan sózdiń ózi ashýlandyrýy múmkin. Úıde otyrǵan áıel neden sharshaıtynyn turǵyndardan surap kórdik.
Erjan Myrzabaev depressıaǵa shaldyqqan áıelder odan aryltýdyń jalǵyz amaly jumysqa shyǵý dep túsinbeýi kerektigin atap ótti. Eger áıel úıde bala kútimine baılanysty otyrsa, nárestesin baqshaǵa berip, jumysqa shyǵýǵa asyqpaı, ózi men sábıiniń densaýlyǵyna kóńil bólýi kerektigin aıtty.
“Bul jerde áıelge jarynyń qoldaýy qajet. Keıde áıel dúnıege bala ákelgennen keıin nárestesine kóbirek kóńil bólip, erkek jyraqta qalyp, qarym-qatynasta krızıs ornap jatady. Batystyq psıhologtar osy jerde erkekter bar jaýapkershilikti alyp, áıeli men balasyn qapsyra qushaptap, kóbirek kóńil bólse, krızıs qarym-qatynasty damytyp, berik ete túsetin múmkindikke aınalady dep tujyrymdaıdy. Sondyqtan erkekter áıelin aıyptamaı, kerisinshe, ony tyńdap, qoldap, úı sharýasynda kómektesip otyrǵany durys” deıdi psıholog.
Maman úıde otyrýǵa májbúr qyz-kelinshekterdiń serigýine sportpen shuǵyldanyp, aınalysatyn ermek tabý, teatr, konsertke baryp, túrli trenıń, semınarlarǵa qatysý arqyly ómirine ártúrlilik engizý jaqsy kómektesetinin jetkizdi. Buǵan onyń jary belsendi atsalysyp, tıisti jaǵdaı jasaýy mańyzdy.
"Al úıde otyrǵan áıel aýyr kúızeliske ushyrasa, onda psıhologtardyń jeke konsýltasıasyna júgingeni jón" deıdi sarapshy.
Posmotret etý pýblıkasıý v Instagram
Pikir qaldyrý