Almatyda qoǵamdyq kólik baǵasyn qymbattatý josparlanyp otyr. Qala ákimdigi jarıalaǵan "Ashyq NQA" portalyndaǵy qujatta jol aqysyn 120 teńgege kóterý, qolma-qol tólemdi múlde alyp tastaý josparlanyp otyrǵany jazylǵan.

"Tasymaldaýshylar qazirgi tarıf avtobýs satyp alýǵa, olardy jańartyp, ýaqytyly jóndeýge, júrgizýshilerdiń jalaqysyn kóterýge jetpeıtinin aıtady. Joba tarıfti 120 teńgege deıin kóterýdi kózdep otyr. Sáıkesinshe, jeńildik sanatyndaǵy azamattar úshin jol aqysy tarıftiń 50%-yn quraıdy" delingen Qalalyq mobıldilik basqarmasynyń habarlamasynda.

Maýsymnyń aıaǵynda Jolaýshylar tasymaly kásiporyndary qaýymdastyǵy jol aqysyn qymbattatý týraly bastama kótergen. Endi qalalyq mobıldilik basqarmasy qaladaǵy ortasha tarıf – 310 teńge, keı marshrýttardy – 400 teńge ekenin málimdep otyr. Óıtkeni sýbsıdıa kólemi artyp keledi. 2023 jyly jol aqysyn sýbsıdıalaýǵa 68,7 mlrd teńge bólinse, bıyl bul soma 97,3 mlrd teńgege jetip qalady dep boljanyp otyr.

Sonymen qatar jol aqysyn qolma-qol tóleýdi alyp tastaý kózdelýde. Bul – júrgizýshige bóget jasamaý, kólegeıli ekonomıka sharttaryn týdyrmaý úshin jasalmaq.

Qujatty talqylaý 17 shildege deıin ashyq.