Qazaqstanda qandastarǵa beriletin óńirlik kvota sany artady. Bastapqy jospar boıynsha, 2433 kvota berilýi tıis bolsa, olardyń sany endi 3033 bolady. Bul týraly Ashyq NQA portalynda jarıalanǵan Eńbek jáne halyqty áleýmettik qorǵaý mınıstri buıryǵynyń jobasynan belgili boldy, dep habarlady Informbúro saıty.

Esesine, Qazaqstanǵa qonys aýdarýshylarǵa beriletin kvota sany 600-ge azaıady. Qandastarǵa artyq kvota berý osy shegerýdiń esebinen kózdelip otyr. Sáıkesinshe, bıyl qonys aýdarýshylarǵa 6450 kvota beriledi. Al bastapqy jospar boıynsha bul mán 7050-ge teń bolatyn. 

Óńirlik kvota boıynsha Qazaqstanǵa kóship kelgen qandastarǵa memleketten áleýmettik qoldaý kórsetiledi. Atap aıtqanda, otbasynyń árbir múshesine 241 500 teńgeden beriledi. Bir jylǵa deıin úı jaldaý úshin aı saıyn 103 500 teńge tólenedi. 

2023 jyly 2337 qandas óńirlik kvotaǵa ıe bolǵan. Olar Qostanaı, Soltústik Qazaqstan, Aqmola, Pavlodar, Abaı jáne Shyǵys Qazaqstan oblystaryna qonystandy. Óńirlik kvota boıynsha qandastardy eń kóp qabyldaǵan oblys – Pavlodar oblysy. Munda 972 qandas qonystanǵan. Keıingi oryndarǵa Qostanaı jáne Aqmola oblystary ıe.