Qazaqstan Respýblıkasy Parlamenti Senatynyń depýtaty Ǵalıasqar Sarybaev Jetisý óńirine jumys sapary aıasynda Taldyqorǵan qalasyndaǵy Qazaqstan Respýblıkasy Ulttyq ulanynyń 5514 áskerı bóliminde boldy.

Kezdesý barysynda halyq qalaýlysy áskerı qyzmetshilermen qaýipsizdikti arttyrý jáne áskerı bólimdi qajetti tehnıkalyq qural jabdyqtarmen qamtamasyz etý máselelerin talqylady. Sondaı-aq, áskerı qyzmetshiler men olardyń otbasylaryn áleýmettik qoldaý máselesi de qarastyryldy.

Senator bólim basshylyǵymen birge áskerı bólimniń qyzmettik-jaýyngerlik jumysymen, quqyqtyq tártip áskeri jaýyngerleriniń qyzmetimen, olardyń turmys jaǵdaıymen tanysyp, turǵyn úı-jaılardy aralady. Sonymen qatar, áskerı tehnıka, atys qarýy men jeke quramnyń arnaıy qural úlgileri kórsetildi.

Ǵalıasqar Sarybaev eń aldymen ulandyqtarǵa arnalǵan áskerı bólimniń jańa aýmaǵyndaǵy qurylys nysandarynyń salyný barysymen tanysty. Búgingi ýaqytta munda 3 tıpti modýldik ǵımarat pen 4 kazarma boı kóterdi. Jaqyn arada shtab, klýb, avtoturaq, sport alańdary jáne basqa da nysandar salý josparlanýda.

Odan keıin 5514 áskerı bóliminiń áskerı qyzmetshilermen áńgimelesip, olardyń kúndelikti tynys-tirshiligimen, qyzmet etý jaǵdaılarymen tanysty. Sondaı-aq oqý jáne qyzmettik mindetterin oryndaýǵa daıyndalatyn jabdyqtalǵan oqý alańdary men oqý kabınetterin, asqana, klýb jáne basqa da nysandardy aralady.

Sapar sońynda senator jas sarbazdarmen kezdesý ótkizip, olarmen ózekti máseleler men túıtkildi taqyryptardy talqylady. Áskerı qyzmetkerlerdiń áleýmettik qorǵalýyn arttyrý, qyzmet etý jáne oqý jaǵdaılaryn jaqsartý, sondaı-aq kásibı damý men mansaptyq ósý máseleleri sıaqty ózekti taqyryptar qozǵaldy.

Áńgime barysynda Ǵalıasqar Sarybaev ulandarǵa elimizdiń tynyshtyǵyn qamtamasyz etýdegi atqaryp júrgen qyzmetterine zor alǵysyn bildirdi. Ol áskerı qyzmetshilerdiń aımaqtaǵy qaýipsizdik pen turaqtylyqty qamtamasyz etýdegi róliniń mańyzdylyǵyn tilge tıek etti.

Senat depýtatymen kezdesý jas sarbazdar úshin ózekti máselelerdi talqylaý múmkindigi ǵana emes, sonymen qatar odan ári qyzmet etýge yntalandyrý boldy. Jas sarbazdar ásker ómirine nazar aýdarǵany úshin rızashylyqtaryn bildirip, óz eline adal jáne abyroıly qyzmet etýge ýáde berdi.

Qazaqstan Respýblıkasynyń Senaty depýtatynyń quqyqtyq tártip áskerine arnaıy is-saparmen kelýi eldiń qorǵanysy men qaýipsizdigi máselelerine asa kóńil bólý kerektigin, sondaı-aq áskerı qyzmetshilerdi qoldaýǵa jáne kómektesýge daıyn ekenin kórsetti. Bul Qazaqstan Respýblıkasyndaǵy áskerı-saıası turaqtylyqty nyǵaıtý jolyndaǵy mańyzdy qadam.

Qazaqstan Respýblıkasy Ulttyq ulany «Ońtústik» óńirlik qolbasshylyǵynyń baspasóz qyzmeti