«Bıyl «B» korpýsynyń rezervinde turǵandardyń elý paıyzyn jumysqa ornalastyra almadyq». Búgin Senattyń jalpy otyrysynda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov osylaı málim etti. Eske salaıyq, jalpy otyrysta «Qazaqstan Respýblıkasynyń memlekettik qyzmeti týraly» zań jobasy talqylanǵan bolatyn. Bul týraly «Qamshy» aqparattyq portaly QazAqparatqa silteme jasap habarlaıdy.

«Aýyldyq jerlerge memlekettik qyzmetshilerdi qabyldaýdyń konkýrsyndaǵy shekti belgileý ózekti másele bolyp tabylady. Óıtkeni, aýdandardan aýylǵa qaraı baratyn adam joq bizde, ondaı úmitkerler tapshy. Sol sebepti biz oǵan kózqarasymyzdy ózgerttik. Qazirgi kúni testileý baǵdarlamasy da olar úshin qıyndaý. Atqaratyn isine, fýnksıasyna saı kelmeıtin jaǵdaılar bar. Osyǵan baılanysty testilik mánge óńirler boıynsha bir ǵana shek qoıyp otyrmyz, sosyn negizinen kandıdattyń kásibı deńgeıine nazar aýdarsaq deımiz», - dedi Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov.

Onyń aıtýynsha, sońǵy ýaqytta kadrlyq rezerv máselesi de ózekti bolyp otyr.

«Máselen, bıylǵy jyly biz «B» korpýsynyń rezervinde turǵandardyń elý paıyzyn jumysqa ornalastyra almadyq. Olardyń ýaqyty kelgen saıyn alynyp tastalady. Osynyń ózi memlekettik qyzmetshiler arasynda bunyń durys, burystyǵyna qatysty kóp áńgime týǵyzyp otyr. Osyndaı olqylyqty joıýdy kózdep otyrmyz», - dedi Q. Qojamjarov.