Mınıstrdiń sózinshe, qazir Qazaqstanda taýarlyq gazdyń ortasha quny myń tekshe metrine – 33 myń 169 teńge. Bul rette taýarlyq gazdyń bekitilgen kóterme baǵasy – 23 myń 646 teńge.

"Gaz salasyna ınvestısıa tartý jáne taýarlyq gazdyń ózindik qunyna qol jetkizý maqsatynda turǵyndar úshin baǵanyń kúrt ósýine jol bermeýdi eskere otyryp, gaz baǵasyn kezeń-kezeńmen kóterý qajet", – dedi mınıstr. 

Mınıstr Qazaqstan 2024 jyldyń 1 shildesinen bastap ishki naryqta taýarlyq gazdy kóterme satýdyń shekti baǵasyn ortasha eseppen 14,6% ósimmen qaıta qaraǵanyn eske saldy.

"Tutastaı alǵanda, úsh jyl ishinde ishki naryqta gazdy shyǵynsyz satýǵa qol jetkizý josparlanyp otyr. Bul eldiń gazǵa degen qajetin óteýge jáne elimiz úshin mańyzdy ınvestısıalyq jobalardy júzege asyrýǵa múmkindik beredi", – dedi Sátqalıev. 

Eske sala keteıik, 1 shildeden bastap Qazaqstanda suıytylǵan munaı gazynyń baǵasy qymbattady. Energetıka mınıstrliginiń málimetinshe, Qazaqstan TMD elderi boıynsha eń tómen baǵalardyń biri – 54 teńgeden 86 teńgege deıin bolsa, Reseıde bir lıtr gazdyń baǵasy 132 teńge, Ázirbaıjanda – 171 teńge, Tájikstanda – 273 teńge.

Sondaı-aq sarapshylar gazdyń 2024 jyly ishki naryqtaǵy tutyný kólemi taǵy 200 myń tonnaǵa artyp, 2,4 mıllıon tonnany quraıtynyn aıtty. Mundaı jaǵdaıda gaz tapshylyǵy 30-40 paıyzǵa jetýi múmkin.