Bıyl elimizdiń birqatar óńirin shegirtkeler shabýyldap, egistik alqapqa qaýip tóndirip otyr. Qazaqstan aýmaǵynda úıirli (azıalyq shegirtke, ıtalándyq prýs jáne marokkalyq shegirtke) jáne saıaq shegirtke taralǵan. Endi osy shegirtkemen kúreske búdjetten taǵy qarjy bólinedi.

Búgin Úkimet otyrysynda premer-mınıstr Oljas Bektenov buǵan deıin 4,2 mıllıard teńge jetpeı qalǵanyn aıtty. Endi qosymsha búdjetten 3,9 mıllıard teńge beriledi.

«Bolashaq eginniń túsimi der kezinde qabyldanǵan shegirtkemen kúres sharalaryna tikeleı baılanysty bolmaq. Ol úshin respýblıkalyq búdjetten 4,2 mlrd teńge bólindi. Sondaı-aq Úkimet rezervinen qosymsha 3,9 mlrd teńge baǵyttaldy. Zıankesterge qarsy hımıalyq óńdeýge 400-den astam arnaıy tehnıka tartyldy», – deıdi Oljas Bektenov.

Jalpy sońǵy 5 jylda shegirtkemen kúreske bólinetin qarjy kólemi 15 ese ósti. Sebebi zıankesterdiń taralý aýmaǵy jyldan jylǵa artyp keledi. 2020 jyly jarty mln gektar aýmaqty jaılasa, bıyl 2,5 mln gektar jerge taralǵan.

Qazir sonyń 2,4 mln gektary tazartyldy. Tek Aqtóbe, Qostanaı oblystarynda nóser jaýyn jaýyp, qatty jel soǵýyna baılanysty ýlaý jumystary keıinge shegerilgen.