Protezdeý jáne ımplant ornatý boıynsha qymbat turatyn stomatologıalyq qyzmetterge qarajatty paıdalanýdy 2024 jylǵy 10 tamyz ben 2025 jylǵy 1 aqpan aralyǵynda ýaqytsha toqtata turý josparlanyp otyr.

Birjolǵy zeınetaqy tólemderi jónindegi ýákiletti operator "Otbasy bank" AQ aqparaty boıynsha Biryńǵaı jınaqtaýshy zeınetaqy qorynan qarajatty stomatologıalyq qyzmetterge paıdalaný kezinde nysanaly emes shyǵarý jaǵdaılary tirkelgen.

Banktiń málimetinshe, ol júrgizgen qyzmettik tekserýlerdiń barysynda jalǵan qujattardy paıdalaný jáne naqty medısınalyq qyzmetterdi kórsetpeý faktileri anyqtaldy.

"Osyǵan baılanysty densaýlyq saqtaý mınıstrligi "Emdeýge birjolǵy zeınetaqy tólemderin paıdalaný qaǵıdalaryn bekitý týraly" Qazaqstan Respýblıkasy Densaýlyq saqtaý mınıstriniń 2021 jylǵy 15 aqpandaǵy № QR DSM-18 buıryǵyna ózgerister engizý týraly" buıryqtyń jobasyn ázirledi. Osy buıryqpen protezdeý jáne tisterdi ımplantattaý boıynsha qymbat turatyn stomatologıalyq qyzmetterge qarajatty paıdalanýdy 2024 jylǵy 10 tamyzdan 2025 jylǵy 1 aqpanǵa deıin alty aı merzimge ýaqytsha toqtata turý kózdeledi”, – delingen habarlamada.

Osy ýaqytta birjolǵy zeınetaqy tólemderi jónindegi ýákiletti operator BJT qarajatyn maqsatsyz paıdalanýǵa jol bermeý jáne stomatologıalyq qyzmetter kórsetýdiń ashyqtyǵyn qamtamasyz etý jóninde tıisti jumys júrgizýge nıetti.

Buıryqtyń jobasy 2024 jylǵy 24 shildede talqylaý úshin Ashyq normatıvtik quqyqtyq aktiler portalynda ornalastyryldy.