Úkimet habarlamasynda elimizde azamattardyń jekelegen sanattaryn dári-dármekpen qamtamasyz etý, mektepterde tegin jáne jeńildikpen tamaqtandyrý 2023 jyldyń sońynan beri pılottyq rejımde iske asyrylyp jatqany jazylǵan.

Sonymen qatar dári-dármekpen qamtamasyz etý boıynsha 43 uıym qosylyp, 30 myń resept iske asyrylǵan. Mektepterde tegin jáne jeńildikpen tamaqtandyrýǵa 93 uıymǵa 27 myń túski as taratyldy. "Áleýmettik ámıandy" ázirleýshiler atalǵan pılottyq jobanyń sátti tájirıbesin taratýǵa nıetti.

"Áleýmettik ámıan" azamattardyń EGOV qosymshasynda memleket tarapynan kórsetiletin barlyq qoldaý quraldary men sharalaryn jınaqtaý arqyly azamattarǵa memlekettik qoldaý sharalaryn alýdy jeńildetý úshin jasalǵan. Atalǵan joba arqyly memlekettik kómek alý jáne onyń júrgizilý tarıhyn qadaǵalaý yńǵaıly. Vaýcherler jekelendirilgen túrde jazylady, bul kez kelgen zańsyz tirkeýlerdiń múmkindigin shekteıdi. Jyl sońyna deıin atalǵan ónim elimizdiń barlyq azamattaryna ystyq tamaq pen dári-dármek boıynsha qoljetimdi bolady dep josparlanyp otyr", — dedi BTS Digital JSHS bas dırektory Nurtaı Ábilǵalıev.

Joba sheńberinde sonymen qatar birneshe shara boıynsha pılottyq jobany iske qosý qosymsha pysyqtalyp jatyr. Olarǵa:

• aqshalaı qarajatty monetızasıalaý;
• erekshe qajeti bar adamdarǵa tehnıkalyq ońaltý quraldaryn satyp alý;
• halyqtyń áleýmettik osal toptaryna ÁMAT tizbesinen azyq-túlik satyp alýda ataýly kómek kórsetý;
• áleýmettik osal sanattaǵy tutynýshylar úshin taýarly gazǵa vaýcherler men JJM baǵasynyń ósýin óteý úshin vaýcherler usyný jatady.