Búgin Almatyda Qazaqstan musylmandary Dinı basqarmasy Múftıat janynan Islam ǵylymı-zertteý ınstıtýty ashyldy. Atalǵan is-sharaǵa zıaly qaýym, atap aıtqanda jazýshy, Qazaqstannyń eńbek sińirgen qaıratkeri Smaǵul Elýbaı, akademık, qoǵam qaıratkeri Asqar Jumadildaev, profesor Marat Toqashbaev, din ókilderi, ımamdar jáne BAQ ókilderi qatysty.

Alǵashqy quttyqtaý sózdi bas múftı Naýryzbaı qajy Taǵanuly alyp, ǵylymı-zertteý ınstıtýtynyń mańyzyna toqtaldy. Akademık A.Jumadildaev Islam dini men ǵylymdy bólip qarastyrýǵa bolmaıtynyn, álem moıyndaǵan ǵulamalardyń kóbi musylman ekenin aıtyp, tarıhtan syr shertti. Jazýshy S.Elýbaı Instıtýttyń ashylýyna qoldaý bildirip, quttyqtaý sóz sóıledi.

Islam ǵylymı-zertteý ınstıtýtyna ıslamtanýshy ǵalym, fılologıa ǵylymynyń kandıdaty, dosent Tóráli Qydyr taǵaıyndaldy. Naýryzbaı qajy Taǵanuly Instıtýt dırektoryna kólik tabystady.

Atalǵan is-sharaǵa Ahmet Baıtursynuly atyndaǵy Til bilimi ınstıtýtynyń Syrtqy baılanystar jónindegi menedjeri Madıar Qazybek qatysyp, Instıtýt ujymynyń quttyqtaýyn jetkizdi jáne Islam ǵylymı-zertteý ınstıtýtynyń kitaphana qoryna kitaptar tabys etti.