İs-sharaǵa Qazaqstan Qarýly kúshteriniń qolbasshylyǵy, jattyǵýǵa qatysýshy elder delegasıalarynyń basshylary, Aqtaý garnızonynyń áskerı qyzmetshileri, ardagerler, teńiz astanasynyń turǵyndary men qonaqtary qatysty.

Jaǵalaýǵa jınalǵandar reıdte qazaqstandyq jáne ázirbaıjandyq áskerı kemelerdi kılvater sapta baqylaı aldy.

Amfıteatr alańynda bes qatysýshy eldiń Qarýly Kúshteriniń basqa bólimsheleri jattyǵýǵa daıyn ekendikterin kórsetti. Osy sáttiń saltanattylyǵy barlyq jaǵynan sezildi: jaýyngerlerdiń symbatty qatarlary men jabdyqtarynda, Qazaqstan, Ázirbaıjan, Qyrǵyzstan, Tájikstan jáne Ózbekstan gımnderin kezekpen oryndaý kezinde týlardy kóterýde.

Qorǵanys mınıstrligi basshylyǵynyń atynan "Birlik-2024" oqý – jattyǵýynyń bastalýymen Qazaqstan Qorǵanys mınıstriniń birinshi orynbasary – QR Qarýly Kúshteri Bas shtabynyń bastyǵy general-leıtenant Sultan Kamaletdınov qatysýshylardy quttyqtady.

Ol bizdiń elderimizdiń halyqtary ata-babalardyń qaharmandyq ótkenine jáne bir-birine degen senimine negizdelgen tyǵyz, dostyq qarym-qatynastardy baılanystyratynyn atap ótti.

"Ortalyq Azıa óńiri men Ázirbaıjan Respýblıkasynyń tórt eliniń qarýly kúshterinen áskerı kontıngentterdi tarta otyryp, oqý-jattyǵý ótkizý formaty alǵash ret qoldanylýda. Bul bizdiń memleketterimizdiń tatý kórshilik qatynastardy odan ári keńeıtýge jáne nyǵaıtýǵa, onyń ishinde qaýipsizdik pen turaqtylyqty qamtamasyz etý máselelerinde umtylysyn aıǵaqtaıdy", – dep atap ótti mınıstrdiń birinshi orynbasary.

General-leıtenant Sultan Kamaletdınov oqý-jattyǵý áskerlerdiń áskerı basqarý organdarynyń úılesimdilik deńgeıin arttyratynyn jáne zańsyz qarýly quralymdardy joıý jónindegi oqý-jaýyngerlik mindetterdi oryndaý kezinde qarýly kúresti júrgizý tásilderin synaqtan ótkizýge múmkindik beretinin aıtty.

"Sizge tabysty qatysý jáne barynsha tıimdi ózara is-qımyl tileımin. Sizderdiń árqaısylaryńyz elderimizdiń qaýipsizdigin qamtamasyz etý boıynsha ortaq kúsh – jigerde paıdaly bolatyn qundy tájirıbe men bilim alsyn", - dep túıindedi ol.

İs-shara oqý-jattyǵýǵa qatysýshy elderdiń áskerı qyzmetshileri kolonnalarynyń saltanatty sherýimen jáne QR Qarýly Kúshteri Ulttyq áskerı-patrıottyq ortalyǵynyń shyǵarmashylyq ujymy daıyndaǵan konserttik baǵdarlamamen aıaqtaldy.