Qazaqstan Respýblıkasynyń Ulttyq qorǵanys ýnıversıtetinde qarý-jaraq pen áskerı tehnıkany damytýdaǵy ózekti úrdisterge arnalǵan ekinshi halyqaralyq ǵylymı-praktıkalyq konferensıa ótti.

İs-sharaǵa Qorǵanys mınıstrliginiń beıindi departamentteriniń basshylary, Qazaqstan Respýblıkasy Qarýly kúshteriniń túrli rýlarynyń, qorǵanys-ónerkásip kesheni kásiporyndarynyń ókilderi, Qazaqstannyń áskerı jáne azamattyq joǵary oqý oryndary, sondaı-aq Reseı Federasıasy Qarýly Kúshteriniń jalpy áskerı akademıasy jáne AQSH-tan Djordj Vashıngton ýnıversıteti qatysty.

Qazaqstan Respýblıkasy Ulttyq qorǵanys ýnıversıtetiniń bastyǵy general-maıor Asqar Mustabekov konferensıaǵa qatysýshylardy quttyqtady. Óz sózinde ol qarý-jaraq pen áskerı tehnıka júıesin tabysty damytý úshin ǵylymı-zertteý jáne tájirıbelik-konstrýktorlyq jumystar júrgizý qajet ekenin atap ótti. Onyń aıtýynsha, bul ǵylymı-tehnıkalyq jetistikter jańa ázirlemeler men óndiristik prosesterdi qurýǵa negiz bola alady.

Konferensıanyń negizgi maqsaty-qarý-jaraq pen áskerı tehnıkany damytý salasynda naqty boljamdardy qalyptastyrýǵa yqpal etý, sondaı-aq osy saladaǵy perspektıvaly ǵylymı-tehnıkalyq baǵyttardy aıqyndaý.

Konferensıa aıasynda Qazaqstan Qarýly kúshteriniń damýyna qatysty teorıalyq jáne praktıkalyq máseleler talqylandy. Atap aıtqanda, ushqyshsyz avıasıalyq júıelerdi, ekıpajsyz qaıyqtardy, zymyran-artıllerıalyq qarý-jaraqty, brondy tank pen avtomobıl tehnıkasyn damytý, sondaı-aq olardy qalpyna keltirý máseleleri boıynsha baıandamalar usynyldy.

Sondaı-aq, Qazaqstan Respýblıkasynyń qorǵanys-ónerkásip keshenin damytý perspektıvalary jáne joǵary oqý oryndary janyndaǵy áskerı kafedralardy qarý-jaraqpen jáne áskerı tehnıkamen qamtamasyz etý erekshelikteri talqylandy.

Konferensıada usynylǵan baıandamalar áskerı-saıası jáne áskerı-strategıalyq mindetterdi sheshýde ǵylym men tehnıkanyń ósip kele jatqan rólin kórsetedi. Baıandamashylar qazirgi jaǵdaıda aqparattyq tehnologıalardyń qarqyndy damýy men qarý-jaraq júıesine ınovasıalyq sheshimderdi engizýevyh qımyldaryn júrgizý tásilderine aıtarlyqtaı áser etetinin jáne jańa talaptar qoıyp otyrǵanyn atap ótti.