Mınıstrdiń aıtýynsha, bıyl memlekettik grant bir bóligi sý tasqynynan zardap shekken óńirdiń túlekterine bólingen eken.

"Sońǵy ýaqytta elimizde oryn alǵan sý tasqyny búkil elge ortaq synaq boldy. Osy jaǵdaıǵa baılanysty, biz joǵary bilim alýǵa granttardyń az ǵana bóligin zardap shekken óńir túlekterine bóldik. Sany kóp te emes, 5112 grant. 20 myńnan astam túlek sý basqan óńirden bitirse, sonyń 10 myńnan astam túlegi ózderińizben birdeı jalpy konkýrspen ótti. Biz ony ádil jáne ashyq túrde bólýge bar kúsh-jigerimizdi saldyq", - dep málimdedi Saıasat Nurbek.

Mınıstr grant nátıjesi jarıalanǵan soń ózine jeke habarlasyp, narazy bolyp jatqandar bar ekenin jasyrmady.

"Keshegi ata-analar men balalardyń qýanysh jasyn kórip, biz de birge qýandyq. Biraq, ókinishke oraı, grant ala almaǵan túlekter men otbasylardyń muńynda da biz birgemiz. Kóptegen adam mınıstrlikke, maǵan habarlasyp, jazyp jatyr, al osy nátıjeni sabyrmen qabyldaǵandar da bar eken", - dedi ol. 

Grant jeńip ala almaǵan talapkerlerge grant alýdyń basqa balama joldaryna usynǵan mınıstr 9 túrli yqtımal tásildi atap ótti.

"Aıtaıyn degenim, úmit úzbeńizder! Grant alý múmkindikteri áli de bar!", - degen ol grant jeńip alýdyń mynadaı joldary týraly aqparat berdi. 

• 3 myńǵa deıin talapker granttan bas tartýy múmkin, olar kelesi joǵary bal jınaǵan talapkerlerge beriledi.
• Jergilikti atqarýshy organdardyń, ıaǵnı ákimdik granttary bar.
• KazEnergy qaýymdastyǵynyń granttaryn qosyńyz.
• H.A.Iasaýı atyndaǵy HQTÝ-da bilim alý úshin Túrkıa Respýblıkasynyń 500 granty.
• Jumys berýshilerdiń granttary.
• Túrkistandaǵy Halyqaralyq týrızm jáne qonaqjaılylyq ýnıversıteti 800 maqsatty grant usynady.
• Qazaqstan halqyna qory 850 grant bóledi.
• Rektorlardyń granty, mysaly Turan-Astana ýnıversıteti Altyn belgi ıegerlerine granttar bólýde.
• Sesıa qorytyndysy boıynsha bos grant alý múmkindigi jáne bar.

"Grant ala almaǵan túlekterdi osy joǵarydaǵy múmkindikterdi barynsha paıdalanýǵa shaqyramyz", -dep jazdy mınıstr sońynda.