Keshe Parlament májilisine baryp, depýtattarǵa eldiń ekonomıkalyq áleýeti týraly esep bergen Ulttyq bank tóraǵasy Qaırat Kelimbetov bank sektory men qurylys salasyna demeý berý úshin qazaqstandyqtardyń zeınetaqy qorlaryndaǵy jınaqtaryn paıdalaný múmkindikterin qarastyryp jatqanyn málimdedi.
Bıik minberden senimdi túrde málimdenýine qaraǵanda halyqtyń jıǵan-tergen aqshasy qaıda, qalaı jumsalatyny búge-shigesine deıin oılastyrylyp qoıǵan syńaıly.
«Úkimetpen birlesip ekonomıkany nesıelendirý jaıy qarastyrylýda. Birińǵaı jınaqtaýshy zeınetaqy qoryndaǵy qarajat osy maqsatqa jumsalatyn bolady. Birinshi kezekte bul qarajat bank sektory men turǵyn-úı qurylysyna baǵyttalady. Bizde bul baǵytta eshqandaı másele joq» degendi Qaırat Nematuly májilis depýtattaryna jerden jeti qoıan tapqandaı jetkizdi. Bastama ıesi halyqtan alǵan qarajatty keri qaıtarýdyń mehanızmderi týraly jaq ashpady. Bas bankırdiń sózine qaraǵanda el ekonomıkasyn shynymen de úlken daǵdarys kútip turǵan syńaıly. Durysy Úkimet ekonomıkalyq qıyndyqtardy sheshýde dármensizdik tanytyp otyrǵandaı. Buǵan jaqyndaǵy Elbasynyń Ulttyq qordaǵy qarajatqa uqyptylyqpen qarap, shyǵyndardy azaıtý týraly aıtqany taǵy bir dálel bola alady.
Depýtattarǵa halyqtyń zeınetaqy qoryn qaıdaı jumsaıtynyn jarıalaǵan Q. Kelimbetov depýtattarǵa aldaǵy ýaqytta tańǵajaıyptarǵa senbeı, munaı baǵasy quldyrap turǵan myna ekonomıkalyq jaǵdaıdy durys baǵalaý kerek degen «aqylyn» da aıtty.
Májilistegi Úkimet saǵatynda Ulttyq ekonomıka mınıstri Erbolat Dosaev kásipkerlikti qoldaý úshin Halyqaralyq qaıta qurý jáne damý bankinen 40 mıllıon AQSH dollary kóleminde qaryz alý týraly kelisimdi maquldaýdy surady. Bul usynysqa da jaqtyrmaǵan keıip tanytqanmen depýtattar qarsy bolmady.
Búginde Birińǵaı zeınetaqy jınaqtaýshy qorynda 10 mıllıonnan asyp jyǵylatyn salymshynyń 4 trıllıon teńgeden astam qarajaty bar. Aıyppuldy ósirip, memleket menshigindegi 200-den astam nysandy satý da ekonomıkalyq qıyndyqtardy sheshý úshin bizdiń bılikke jetkiliksiz kórinip otyr. Onsyz da zeınetaqy qorynyń basqarýshylar keńesi bankterdegi nesıeleý júıesi arqyly ózimizge joǵary paıyzben nesıe retinde usynyp, shaǵyn toptyń múddesine qyzmet etip otyrǵan aqsha endi taǵy da bolashaǵy buldyr, qaıtarymy kúmándi jobalarǵa salynbaqshy. Úkimettiń úmit úzdiretin osyndaı qylyqtaryna qarap otyryp, halyqaralyq «krızıs» sózin tildik qorymyzdaǵy toqyraý, sharasyzdyq maǵynasyna jaqyn «daǵdarys» dep aýdarǵan tilshilerimizdiń talantyna tań qalasyń.
Darhan Muqan
