Qazirde qazaqstandyq shoý-bıznes ókilderiniń birazy kásipker atanyp júr. Olardyń keıbiri jeke stýdıa, prodúserlik ortalyq ashyp alsa, endi bireýleri meıramhana bıznesin jaqsy jandandyrýda. Bul týraly "Qamshy" portaly Nur.kz-ke silteme jasaı otyrp habarlaıdy.
Ánshi Altynaı Jorabaeva jýrnalıserge bergen suhbattarynyń birinde “Qazaqstan temir joly” kompanıasymen birlese isteıtin otbasylyq kásibi bar ekenin aıtyp qalǵan.
Ártistiń prodúseri ári jary Sábıt Ábdihalyqovqa habarlasqanymyzda, ol bul aqparatty rastady. “Aqbýra NS” jaýapkershiligi shekteýli seriktestigin Sábıttiń týystary birlesip basqarady eken. Seriktestik jolaýshylarǵa arnap poıyz tósenish-jamylǵylaryn tigýmen aınalysady.
Ánshi Roza Álqoja Almaty qalasynan «Men syıǵa tartqan oramal» degen ataýmen oramal dúkenin ashqan bolatyn. Dúkenniń ashylý saltanatynda kásipker ónerpaz ózin quttyqtap kelgen qonaqtarǵa oramal úlestirdi. Ánshi bolashaqta kásibin ulttyq brendke aınaldyrýdy josparlap otyr.
Burynǵy “KZ” tobynyń múshesi, ánshi Rústem Nurjigit te shyǵarmashylyǵy men jeke kásibin qatar alyp júr. Onyń Almatyda Buqar jyraý-Baıtursynov jáne Áýezov-Jandosov kósheleriniń qıylysynda ornalasqan «Coffeetime» atty kofehanalary bar. Jas kásipker qyzmet sapasyna qatty mán beredi eken.
“Kelýshiler tek kofe iship ketpeı, lázzat alyp, demalyp qaıtsa eken”, – deıdi ánshi jigit.
El aýzynda Maıra İlıasova men tanymal aqyn Aınur Tursynbaeva páterlerin jalǵa beredi degen maǵlumat bar.
Maıra İlıasova bul tabys kózin eshkimnen jasyrmaıdy, tipti jeke prodúserlik ortalyǵynan da qarjy taýyp, bala-shaǵasynyń, nemereleriniń bolashaǵyna qazirden oılaıtynyn alǵa tartady.
Jas ánshi Dınara Qyryqbaeva da - otandyq naryqta óz ornyn tapqan kásipker. Onyń toı men ár túrli saýyq keshterin uıymdastyratyn, ádemilep bezendiretin ıvent agenttigi bar.
Esterińizge sala keteıik, Ulyqpan Joldasovtyń uly Bolattyń úılený toıyn bezendirý- Qyryqbaevanyń qolastyndaǵy jumysshylarǵa tapsyrylǵan bolatyn.
Al, Aqjol Meıirbekovtiń otbasylyq kásibi bolyp esepteletin týrısik fırmasy týraly jurtshylyq áste bile bermeıdi. Óner ıesiniń bul kásipti dóńgeletip otyrǵanyna 15 jyldan asqan. Tanymal ártis bıznesiniń arqasynda álemniń biraz jerin aralap kelgen kórinedi.
Qazaqstandyq shoý-bıznestiń taǵy bir ókili Nurlan Abdýllınniń Astanada “Abdýlla” atty úlken meıramhanasy bar. Ártistiń ózi bul kásibin birneshe adammen bólisip otyrǵanyn aıtady.
“Bıznesti júrgizip otyrǵan birneshe partner (áriptes) jigitter bar ǵoı”, – deıdi Abdýllın áńgimeni basqa arnaǵa aýdarǵysy kep. Ánshi jeke kásibi týraly ashyp aıtqysy kelmese de, biraz istiń basyn qaıyryp júrgen syńaı tanytty.
Ulttyq oıynshyqtar shyǵarýmen aınalysatyn Qydyráli Bolmanovtyń osy kásippen tabys taýyp júrgenine bes jyldyń júzi bolǵan.
Tirlikke epti Bolmanov jan jary Qaraqat Ábildınanyń jeke mektep-stýdıasyn ashýǵa da atsalysqan. Qazirde Qaraqat stýdıasynyń qarlyǵashtary túrli halyqaralyq jarystarǵa qatysyp, júldeli oryndar ıelenýde.
Bolmanovtyń oıynda áli talaı joba bar. Solardyń biri – daryndy balalar mektebin ashý eken. Aıta keterligi, jaqynda Bolmanovtar otbasy taǵy bir otandyq ónimdi aınalymǵa shyǵardy. Ol – qýat kózi birneshe ese kóp batareıkalar.
Toqtar Serikovtyń at baptaıtyn qasıeti tyńdarmandaryna tańsyq emes. Ártis jeke sharýashylyǵyn ashyp, qazirde sahnada kóp kórinbeıtin boldy. Soǵan qaraǵanda, Toqtardyń shyǵarmashylyǵynan góri sharýashylyǵy kóp paıda ákeletin syńaıly.
Aqylbek Jemeneı de kásipker áriptesterinen qalyspaı, “Zhemeney records” stýdıasyn ashyp, tipti “Zhemeney” brendimen tiktirilgen pıdjagyn otandyq telearnalardyń birinde usynyp úlgerdi. Ártistiń kıim óndiretin kásibi erlerge arnalǵan kıim tigýmen aınalyspaq.
Al ánshi Shákızada án aıtýdan bólek, biraz jyl boıy “L-kapıtal” ınvestısıalyq kompanıasynda qarjy keńesshisi bolyp qyzmet atqarady. Naryqta qundy qaǵazdardy satýǵa bilek sybana kirisken ártis bos ýaqytynda sahnalyq áriptesterine aqshamen baıý joldaryn aıtyp júredi.
“Sahnada júrgen soń, jańa kóılek kerek. Halyq aldyna ádemi bop shyqqyń keledi. Onyń bári aqshaǵa kelip tireledi. Bala-shaǵa degen taǵy bar. Olarǵa da kómekteskiń keledi. Bir ánmen kún kórý múmkin emes”, – dedi Shákızada bizdiń saýalymyzǵa.
