Qazaqstanda elektr energıasynyń 70% kómir stansıalarynda óndiriledi, olardyń tozý deńgeıi óte joǵary. Bul týraly QR Energetıka mınıstrliginiń Atom energetıkasy jáne ónerkásip departamenti dırektorynyń orynbasary Gúlmıra Mýrsalova Astanada ótip jatqan Qazaqstanda atom elektr stansıasyn salý máselesi boıynsha kópshilik talqylaýynda málimdedi.

Onyń aıtýynsha, bul stansıalardyń keıbiri kelesi 10 jyl ishinde paıdalanýdan shyǵarylýy kerek. Bul rette elimizde elektr energıasyn tutyný kólemi jyldan jylǵa ósip keledi. Bul sebepten 2035 jylǵa qaraı arnaıy jospar bekitilgen bolatyn. Bul jospar boıynsha kelesi onjyldyqta 26 myń MVt qýattylyǵy bar stansıalar iske qosylady. Árıne, onyń ishinde qoldanystaǵy stansıalardy jańartý jumystary da bar, jańadan stansıalardy salý da josparlanǵan.

G.Mýrsalova Qazaqstanda jańartylǵan energıa kózderi óte jaqsy damytylyp jatqanyn atap ótti. Jańadan jel elektr stansıalary, kún elektr stansıalary salynady. Búkil 26 myń MVt qýattylyqtyń 10 myń MVt jýyq JEK iske qosylady.

Onyń aıtýynsha, qazirgi ýaqytta kómirmen jumys isteıtin stansıalarǵa qarjy tartý qıyn bolyp tur. Sebebi kómirmen jumys isteıtin stansıalardyń kómirqyshqyl gazdarynyń shyǵyndary óte joǵary.

“Sol sebepten referendýmnyń nátıjesi oń bolǵan jaǵdaıda ǵana biz úlken qýatty eki reaktory bar bir atom elektr stansıasyn qarastyramyz. Sebebi AES jasyl energetıkaǵa jatady. kómirqyshqyl gazdarynyń shyǵyndary 0”, - dedi G. Mýrsalova.