Orynbordaǵy "Iasnaıa" alańynan ushyrylatyn zymyran qaldyqtary Mańǵystaý óńirine qulaıtyn boldy. Bul týraly «Qamshy» portaly http://qamshy.kz/home/show/2256 «Qazaqstan 120 mıllıon teńgege Reseıden ý satyp alatyn boldy» degen atpen materıal da usynǵan bolatyn. Mańǵystaýdyń ne kúnasy bar edi? Táýelsizdik jyldarynan bergi ekonomıkamyzdyń negizgi tutqasy munaıǵa baılanysty damyǵanyn kim joqqa shyǵara alady? Endeshe, munaı qazandyqtarynyń qaspaǵy kórinip, álemdik deńgeıde qara altynnyń quny qasha bastaǵanda munaıly ólkege ý tóge berýge bolady degen sóz ba?
Qaldyqtardyń qaı aýmaqqa qulaıtyny men jer kólemi de áli naqtylanbaǵan. Bir anyǵy, Mańǵystaý óńiri zymyran qaldyqtary úshin qomaqty qarajatqa ıe bolady-mys. Bul somma jylyna shamamen jarty mıllıard dollardy quramaq eken.Bul qalaı sonda, ekonomıkalyq daǵdarystan shyǵýdyń taǵy bir tásili me? Halqynyń densaýlyǵyn aqshaǵa sarp ete salatyn eldi qaıdan kórip edińizder? Reseı prezıdentiniń Qazaqstanǵa resmı sapary kezinde jasalǵan kelisim jaqyn arada áreketke kóshedi. Nege bizdiń eldiń tarapynan jasalǵan kelisimniń barlyǵy qazaqtyń kózinen jas shyǵaratyndaı únemi zaharly bolady? QR Investısıa jáne damý mınıstrligi Aeroǵarysh komıteti tóraǵasynyń orynbasary Meıirbek Moldabekov jýrnalıserge bergen málimdemesinde: "Mańǵystaý oblysy jerdi jalǵa bergeni úshin tıisti qarajatyn alady. Meniń bilýimshe shamamen 500 myń dollar kóleminde. Somma qomaqty. Óıtkeni Mańǵystaý oblysynyń ákimdigi kelisimdi qýana maquldady. Bul aqsha oblys búdjetine túsedi. Zymyran qaldyqtaryna bólinetin naqty terıtorıany aıta alamaımyn. Biraq úlken emes", - degen eken.
Biz ádette bir búıregin satamyn degen bir qazaqty kórsek, barymyzdy salyp talqylaımyz. Ia, mıllıondar ishinde bir adamnyń búırek satýy-sóz be, táıiri?! Al, Mańǵystaýdyń jerine ý sebilý týraly sheshim- qazaqtyń, ıaǵnı bútin bir ulttyń bir múshesin satqanmen birdeı emes pe? Endi biz baýyrmaldyǵynan aırylyp, tasbaýyrǵa aınalǵan ult qana emes, búıregi búlk etpeıtin qazaqqa aınalamyz. Ia, aspannan alyp zymyrannyń qaldyǵy qulap jatsa da qyńq etpeıtin ne degen myqty qazaq edik. Tym quryǵanda kózińnen bir tamshyny mólt etkizip qoısańshy. Álde ol myqtylyǵymyzǵa syn ba?
Aınur Tóleý
