Almatyda aǵashtardy qatigezdikpen syndyrǵan er adam qolǵa tústi. Bul týraly Polisia.kz portaly habarlady.

Buzaqylyq áreket Almaty ózeniniń boıynda, Tóle bı men Raıymbek dańǵyldarynyń arasynda bolǵan. Orman qoryna kiretin jáne kesýge tyıym salynǵan kóshetterdiń zaqymdalýyna qatysty qyzmet kórsetýshi kompanıanyń ókili aryz bergen. Qatigezdik áreketke narazy bolǵan jergilikti turǵyndar áleýmettik jelide dabyl qaqqan.

– Qazirgi tańda aǵashtardyń zaqymdalýyna qatysty qylmystyq is tergelýde. Aryzdanýshynyń aıtýynsha, tekserý kezinde 36 dana kóshettiń zaqymdanýy jáne ólýi anyqtaldy, atap aıtqanda: katalpa – 15 dana, akasıa – 7 dana, qaraǵash – 14 dana. Osy qylmysty jasady degen kúdikpen 27 jastaǵy jigit ustaldy, ol buzaqylyq maqsatynda aǵashtardy syndyrǵanyn aıtty. Kúdikti ýaqytsha ustaý ızolátoryna ornalastyryldy. İs sotqa jiberiletin bolady, – dedi Áýezov aýdandyq polısıa basqarmasynyń bastyǵy Ulan Ábilqaıyr.

Kúdikti óziniń áreketin sol kúni kóńil-kúıi bolmaı, emosıonaldyq aýytqýǵa ushyraǵanymen túsindirgen.