QR Oqý-aǵartý mınıstrligi mektepke deıingi jastaǵy balalardyń damý kartasyn avtomattandyrdy. Bul karta balalardyń damýyn baqylaýǵa jáne olardyń boıynda daǵdylardyń qanshalyqty qalyptasqanyn baǵalaýǵa múmkindik beredi.

Mektepke deıingi bilim berý departamentiniń dırektory Manar Adamova atap ótkendeı, bul karta bastaýysh synyp pedagogteri úshin balalardyń mektep baǵdarlamasyn odan ári meńgerýinde mańyzdy qural bolmaq. Karta sıfrlyq formatqa aýystyrylyp, Ulttyq bilim berý derekter bazasymen ıntegrasıalanǵan, bul mektepterge aqparatty berýde mektepke deıingi jáne bastaýysh bilim berý arasyndaǵy úzdiksiz baılanysty qamtamasyz etedi.

Mektepke deıingi jastaǵy balalardyń damý kartasy ár balanyń qajettilikterin tereńirek túsinýge jáne ony mektepte sátti bilim alýǵa daıyndaýǵa múmkindik beredi. Kartada damýdyń barlyq mańyzdy aspektileri kórsetilgen: fızıkalyq jaǵdaıy, Tıptik oqý baǵdarlamasyn meńgerý barysynda qalyptasatyn kommýnıkatıvtik, tanymdyq, zıatkerlik, shyǵarmashylyq, zertteýshilik jáne áleýmettik-emosıonaldyq daǵdylary. Mundaı júıeli tásil sapaly bilim berýdi qamtamasyz etedi jáne balalardyń bastaýysh mektepte sátti beıimdelýine yqpal etedi, — deıdi Adamova.

Elimizde 2-6 jas aralyǵyndaǵy shamamen 1 mln balany qamtıtyn 11,5 myńnan astam mektepke deıingi uıym jumys isteıdi.