Bankter týraly jańa zań qajet. Bul týraly prezıdent Qasym-Jomart Toqaev "Ádiletti Qazaqstan: zań men tártip, ekonomıkalyq ósim, qoǵamdyq optımızm" atty Qazaqstan halqyna Joldaýynda málim etti.

Q.Toqaev úkimet pen ulttyq bank bankterdiń ekonomıkaǵa kóbirek qarjy quıýyna jaǵdaı jasaý úshin ońtaıly sheshimder oılastyrýy kerektigin aıtty.

"Halyqaralyq sarapshylar qazaq bankterin resýrsqa baı elder ishindegi eń kóp paıda tabatyn bankter sanatyna qosady. Sondyqtan osy saladaǵy salyq mólsheri ádil belgilenýge tıis. Bankterdiń aksıonerleri dıvıdendine sáıkes salyq tóleýi kerek. Bankterge memleket kórsetken kómek turǵysynan qarasaq, bul – óte oryndy ustanym. Bizge Bankter týraly jańa zań qajet. Bul qujatta ekonomıkalyq belsendilikti qoldaý jáne fınteh salasyn qarqyndy damytý sıaqty ózekti máseleler sheshimin tabýy kerek. Qazir qoldanyp júrgen zań shamamen 30 jyl buryn qabyldanǵan. Ol kezde zaman da múlde basqa boldy" dedi prezıdent.