Almaty oblysynda "Mektepke jol" naýqany jalǵasyp jatyr. Búginge deıin 14 myńnan astam balaǵan kómek berilgen.
Oblystyq bilim basqarmasynyń bas mamany Dýman Daýlethanulynyń aıtýynsha, óńirde 432 memlekettik mektep bar jáne onda bilim alatyn 50 myń bala áleýmettik kómekke muqtaj. Basqarama ókili bıyl osy oqýshylarǵa kómek kórsetiletinin aıtty.
Al oblystyq bilim basqarmasynyń "Orta bilimdi damytý" bóliminiń bas mamany Aıymgúl Saınqyzy bıyl ár balaǵa oqý quraldaryn alýǵa qarjy bólingenin atap ótti. Materıaldyq kómek kólemi sońǵy 3 jylda 2,5 ese artyp, 17 myń teńgeden 43 407 teńgege jetken.
– Oblysta jetim, ata-anasynyń qamqorlyǵynsyz qalǵandarǵa, áleýmettik az qamtylǵan jáne tótenshe jaǵdaı saldarynan zardap shekken otbasydan shyqqan 14 012 balanyń zańdy ókilderine 608,2 mln teńge aýdaryldy. Materıaldyq kómekti alý úshin ár ata-ana mektep dırektorynyń atyna ótinish jazý qajet, – dedi Aıymgúl Saınqyzy.
"Mektepke jol" naýqany 20 tamyzǵa deıin jalǵasady.
Pikir qaldyrý