Qamshy redaksıasyna Aqtóbe oblysy Yrǵyz aýdany Nura aýylynyń bir top turǵynynan prezıdent Q.Toqaevtyń, premer-mınıstr O.Bektenovtyń atyna joldanǵan hat kelip tústi. Hatqa qol qoıǵan 9 adam aýyldaǵy T.Júrgenov atyndaǵy mektep-ınternat sý tasqyny saldarynan jaramsyz bolyp qalǵandyqtan, jumyssyz júrgenin jetkizip, ınternatty qaıta ashýdy suraıdy.
Alaıda aýdan ákimi men aýdandyq bilim bólimi bala sanynyń azdyǵynan ınternat qaıta ashylmaıtynyn aıtqan. Al oqýshylar búginde aýdan ortalyǵyna qatynap oqyp jatqan kórinedi.
Mektep-ınternaty qyzmetkerleriniń sózinshe, ınternattyń ashylýyn surap, 10 ata-ana ótinish jazǵan, balalaryn osynda oqytqysy keletinderdiń jalpy sany jıyrmaǵa jýyqtaıtyn kórinedi.
Qurylys aıaqtalmaı, úısiz-kúısiz júrgende jumys oryndarynyń jabylýy jyǵylǵanǵa judyryq boldy degen aryzdanýshylar osy qıyn shaqty eskerip, prezıdent pen premer-mınıstrden tym bolmasa jumys oryndarynyń saqtalýyna kómektesýdi suraıdy.
Budan bólek ujymdyq hatty joldaǵan jergilikti turǵyn Qaırat Aıjarqynuly Nura aýylynyń turǵyndaryn qurylystyń baıaý júrip jatqany alańdatatynyn jetkizdi. Sózinshe, jergilikti ákimdik úıler qazan aıynda paıdalanýǵa beriledi dep sendirgenimen, oǵan úlgermeıtin túri bar. Óıtkeni jumys kúshi jetpeıdi. Qora-qopsynyń jaıy áli belgisiz. Ázirge mal dalada jaıylyp júr, kún sýytqanda olardy qaıda qamap, qaıda ustaıtynyn da turǵyndar bilmeı dal.
Pikir qaldyrý