Mańǵystaý oblysynda mektep asqanasynan ýlanǵan balalardyń 17-si em alýyn aıaqtap, aýrýhanadan shyǵaryldy. Stasıonarda 75 bala emin jalǵastyrýda, olardyń da jaǵdaıy turaqty, dep habarlady densaýlyq saqtaý mınıstrligi.
Aýrý shyqqan kezden bastap qyzýy kóterilýi, ishiniń ótýi, loqsý, álsizdik boıynsha 460 bala dárigerlerge qaralǵan. Sonyń ishinde 92 bala aýrýhanaǵa jatqyzylǵan.
"Barlyq naýqastar antıbakterıalyq jáne dezıntoksıkasıalyq, sonymen qatar sımptomatıkalyq em alýda. Dárigerler ishek mıkroflorasyn qalpyna keltirý jáne regıdratasıalaý boıynsha zamanaýı ádisterdi qoldanýda, bul naýqastardyń boıynda aýrýdyń belgilerin edáýir tómendetýge septik etti" delingen mınıstrlik habarlamasynda.
6 qyrkúıek kúni Munaıly aýdanyndaǵy №8 mektep asqanasynda balalar jappaı ýlanǵan. Atalǵan derek boıynsha polısıa "Sanıtarıalyq qaǵıdalardy nemese gıgıenalyq normatıvterdi buzý" aıyby boıynsha qylmystyq is qozǵady.
Pikir qaldyrý