Jańa oqý jyly qarsańynda Almatyda jeke ınvestısıalar esebinen salynǵan 980 tósek-orynǵa arnalǵan úsh zamanaýı jataqhana ashyldy, dep habarlaıdy Qamshy,kz aqparattyq agenttigi.

Saltanatty rásim 2024 jyldyń 24 tamyzynda ótti. Oǵan QR Ǵylym jáne joǵary bilim mınıstri Saıasat Nurbek, Qala ákiminiń orynbasary Azamat Qaldybekov, qoǵamdyq belsendiler men qala jastary qatysty.

"Jataqhanalar tıisti talaptarǵa tolyq jaýap beredi. Munda barlyq qajetti turmystyq zattar bar. Sondaı-aq, korpýsta stýdentterge arnalǵan kovorkıng-aımaq, asqana men konferens-zal qarastyrylǵan", - dep habarlady megapolıs ákimdigi.

Buǵan deıin ákim Erbolat Dosaev jataqhanalar problemasy onyń tikeleı baqylaýynda ekenin atap ótken bolatyn. Ol Almatyǵa oqýǵa kelgen stýdentterdi joǵary bilimmen qatar jaıly jaǵdaıda turýmen qamtamasyz etý qajettigin atap ótti.

Jańa jataqhanalardyń ashylýynda ákimniń orynbasary Azamat Qaldybekov Erbolat Dosaevtyń quttyqtaýyn oqydy:

"Stýdentter úıi-bul Almaty kartasyndaǵy jańa nysan ǵana emes. Mundaı jaǵdaıda ár stýdent ózin úıde sezinedi, sonymen birge ózi úshin jańa ortaǵa ońaı enip, sapaly bilim alyp, qalanyń damýyna óz úlesin qosa alady. Qurylys jeke qarajat esebinen júrgizilgenin atap ótkim keledi, bul jalpy ózin-ózi qamtamasyz etetin megapolıs úshin jaqsy tájirıbe".

Sondaı-aq Azamat Qaldybekov Almaty ákimdigi Qazaqstandyq jáne sheteldik stýdentterdiń jaıly turýy úshin stýdenttik jataqhanalar salýdy jalǵastyrýǵa nıetti ekenin atap ótti. 2024 jyly 5025 tósek-orynǵa arnalǵan on nysandy, al 2025-2026 jyldary 34 myńnan astam tósek-oryndy paıdalanýǵa berý josparlanýda.

Esterińizge sala keteıik, jataqhanalardy salý boıynsha jumysty tıimdi úılestirý úshin stýdenttik jataqhanalardy salý boıynsha jobalyq keńse óz jumysyn jalǵastyrýda. Onyń negizgi mindeti-Almaty aýmaǵynda jataqhanalar salý jáne stýdentterdi turǵyn úımen qamtamasyz etý jónindegi memlekettik baǵdarlamany iske asyrý úshin qolaıly jaǵdaılar jasaý. İske qosylǵan sátten bastap jobalyq keńsege 120 áleýetti ınvestor júgindi, olardyń 67-si qazir jumysta, bul osy qoldaý tetiginiń tartymdylyǵyn kórsetedi.

Buǵan deıin qazaqstandyq joǵary oqý oryndarynda jataqhanalardaǵy oryndardy bólý kezinde tásil ózgeretini habarlanǵan bolatyn. Tıisti túzetýler ǵylym jáne joǵary bilim mınıstrliginde daıyndaldy.