Abaı garnızonynyń áýe bazasynyń ushqyshtary «Shyǵys» túraralyq polıgonynda ótken aldyńǵy sheptegi avıasıalyq kózdeýshiler kýrsyna qatysty.

Semeı qalasynda ornalasqan 54835 áskerı bóliminiń ushqyshtar jeke quramy nysanashylardyń aldyn ala bergen málimeti boıynsha shartty túrdegi jaýdyń kózin joıý jattyǵýlaryn ótkizdi.

54835 áskerı bólimi komandıriniń orynbasary podpolkovnık Mansur Nýrjanovtyń aıtýynsha, mundaı jattyǵýlar ushqyshtardyń ushý mashyqtaryn arttyryp, nysanany dál kózdeýde sheberlikterin shyńdaıdy.

- Oqý-jattyǵý jıynynda áýe bazasynyń jeke quramy Mı-17 tikushaǵymen ushyp, S-8 zymyranymen áýeden 2 shaqyrym qashyqtyqtan soqqy jasady. Jattyǵýlar barasynda ushqyshtar ózderiniń tájirıbeleriniń joǵary deńgeıde ekenin kórsete bildi. Kózdelgen maqsattardyń barlyǵy oryndaldy, - deıdi podpolkovnık Mansur Nýrjanov.

«Astana» óńirlik qolbasshylyǵy áskerlerine qarasty 31775 áskerı bóliminiń vzvod komandıri leıtenant Dıas Qaldanovtyń aıtýynsha, tájirıbe almasýdaǵy negizgi maqsat jaýdy aldyn-ala anyqtap, ol týraly aqparatty tikushaq ekıpajyna berý jáne jaýdy joıýǵa kómektesý.

- Oqý-jattyǵýlar joǵary deńgeıde ótti. Aldaǵy ýaqytta tájirıbemizdi shyńdaı beretinime senimdimin. Abaı garnızonyndaǵy áýe bazasynyń jeke quramyna alǵysymyzdy bildiremiz, - leıtenant Dıas Qaldanov.