Májilis depýtaty Nartaı Aralbaıuly qorǵanys mınıstri Rýslan Jaqsylyqovqa joldaǵan depýtattyq saýal joldap, áskerdegi keleńsizdikti tyıý jáne aldyn alý boıynsha naqty sharalardy qabyldaý boıynsha usynystar joldady.
Onyń sózinshe, áskerde sońǵy úsh jylda 270 áskerı qyzmetker qaıtys bolǵan, al sońǵy tórt jylda áskerde 86 sýısıd tirkelgen, 20 áskerı adam óz-ózine qol salýǵa oqtalǵan.
– 2023 jylǵy tamyzda áskerı bólimshelerdiń birinde komandır áskerge jańadan kelgen sarbazdy oryndyqpen uryp, soqqyǵa jyqqan. 2024 jyldyń maýsym aıynda Jambyl oblysynyń bir áskerı bólimshesinde áskerge kelgenine 1-aq aı bolǵan sarbaz es-tússiz jansaqtaý bólimine túsken. Al taıaýda oryn alǵan jaǵdaı búkil otandasymyzdyń ashý-yzasyn týǵyzdy. Ulttyq ulannyń jaýyngeri Erbaıan Muhtar basynan alǵan jaraqattan bes aı boıy es-tússiz jatyr. Jaýaptylar «Erbaıan dárethanaǵa qulap, jaraqattandy» deıdi. Buǵan kim senedi? Jaraqattyń saldarynan sarbazdyń basynyń jartysyn alyp tastaýǵa týra kelgen. Endi oǵan turaqty kútim qajet. Qazir ata-anasy Erbaıandy shetelge emge áketýge qam jasaýda, – degen depýtat múndaı shýly oqıǵalardyń birli jarymyn ǵana keltirdi.
Sondaı-aq ol Qorǵanys mınıstrligi aıtqan áskerı bólimderdegi 50 myńnan astam beınekameranyń jazbalaryn surap, kerek kezde solar nege joq bolyp shyǵatynyna nazar aýdardy.
Áskerı qyzmetkerlerdiń áleýmettik jaǵdaıy tómen, olardyń jalaqysy 2008 jyly ǵana kóterilgenin eske salǵan depýtat mınıstrge tómendegideı eki usynys jolady.
- Elimizdiń armıasyndaǵy atalǵan keleńsizdikti tyıý jáne aldyn alý boıynsha naqty sharalardy qabyldaý.
- Áskerılerdiń áleýmettik jaǵdaıyn jaqsartýǵa baǵyttalǵan jobalady qolǵa alyp, olardyń iske asýyn jedeldetý
Pikir qaldyrý