Mınıstrler Syrdarıa ózenindegi sý beketterin avtomattandyrý men sýdy esepke alýdy sıfrlandyrý jóninde sóılesti. Búgingi tańda Qazaqstan men Ózbekstan zamanaýı sýdy esepke alý júıesi ornatylatyn 10 beket týraly kelisimge keldi. Nurjan Nurjigitov halyqaralyq qarjy uıymdarymen jáne kompanıalarmen jobany birlesip iske asyrý boıynsha kelissóz júrgizilip jatqanyn atap ótti.

Sondaı-aq, taraptar kelesi jylǵy sýarý maýsymyna deıin Naryn-Syrdarıa sý qoımalary kaskadynyń jumys tártibin talqylady.

Ortalyq Azıanyń Memleketaralyq sý sharýashylyǵyn úılestirý komısıasynyń aldaǵy otyrysynda sý qoımalary jumysynyń boljamdy kestesi jasalyp, sý berý kólemi bekitiletin bolady.

«Halyqaralyq Araldy qutqarý qorynyń otyrysyna belsendi qatysqan jáne usynystarymen bólisken ózbekstandyq áriptesterimizge úlken raqmet aıtamyn. Bir jyl ishinde biz birlesken jumysymyzdyń oń nátıje beretinine kóz jetkizdik. Sondyqtan ekijaqty tyǵyz yntymaqtastyqty jalǵastyrýǵa nıettimiz. Kóptegen másele boıynsha biz ortaq kelisimge keldik. Bul bizge kún tártibindegi máselelerdiń kópshiligin ózara tıimdi negizde sheshýge múmkindik beredi», – dedi Sý resýrstary jáne ırrıgasıa mınıstri Nurjan Nurjigitov.

Shavkat Hamraev Ózbekstan HAQQ aıasynda da ózara is-qımyldy nyǵaıtýǵa nıetti ekenin de málimdedi.

«Ózbekstan Qazaqstannyń Halyqaralyq Araldy qutqarý qoryna tóraǵalyǵyn tolyq qoldaıdy. Biz osy baǵyttaǵy ózara is-qımyldy kúsheıtip, birlesken jobalarmen jumys istegimiz keledi. Mysaly, Syrdarıa jáne Amýdarıa ózenderi baseınderiniń ekojúıesin saqtaý, jergilikti turǵyndardy sapaly aýyz sýmen qamtamasyz etý, shaǵyn jáne jergilikti sý aıdyndaryn qalpyna keltirý jáne t.b. is-sharalardy iske asyrýǵa nıettimiz, – dedi Ózbekstan Sý sharýashylyǵy mınıstri Shavkat Hamraev.

Budan bólek, taraptar sý resýrstaryn utymdy paıdalanýdyń óńirlik strategıasyn ázirleý máselesin talqylady. Kelissóz qorytyndysy boıynsha mınıstrler kezdesý hattamasyna qol qoıdy.