Prezıdenttikke úmitker Donald Tramp Ýkraınanyń jeńiske jetýi ekitalaı ekenin aıtty. Al Ókilder palatasynyń spıkeri Maık Djonson Zelenskııdiń Pensılvanıaǵa saparyna baılanysty Ýkraınanyń AQSH-taǵy elshisin qyzmetinen bosatýdy talap etti.

Zelenskııdiń saparynan keıin prezıdent Djo Baıden Ýkraınaǵa jańa áskerı kómek retinde 7,9 mıllıard dollar bóletinin jarıalady. Sonymen qatar Ýkraına birikken tirek qarýynyń planer bombalaryn, Patriot áýe qorǵanys júıesiniń taǵy bir batareıasyn jáne qosymsha zymyrandar alady. AQSH, sonymen qatar, ýkraınalyq ushqyshtardy F-16 joıǵyshtaryn basqarýǵa úıretý baǵdarlamasyn engizedi.

Jańa paketten 5,5 mıllıard dollar 30 qyrkúıekke deıin bólinýi kerek.

Keıin Zelenskıı Aqúıge demokratıalyq partıadan úmitker AQSH vıse-prezıdenti Kamala Harrıspen de kezdesti.

Ol ózimen birge Ýkraınanyń "Jeńis jospary" qujatyn alyp keldi. Qujattyń mazmuny áli jarıalanǵan joq, onyń tek tórt tarmaqtan turatyny belgili: Ýkraınaǵa áskerı kómek, ekonomıkalyq qadamdar, agresorǵa dıplomatıalyq qysym jáne "Reseıdiń saıası májbúrleýi".

Baıden ákimshiliginiń birneshe joǵary laýazymdy sheneýnikteri "Jeńis josparymen" jalpy tanysyp, onyń mazmunyna kóńili tolmady.

Aqúı sheneýnikteri bul josparda kóbirek qarý-jaraqpen qamtamasyz etý jáne amerıkalyq zymyrandardy Reseıdegi nysanaǵa qarsy qoldaný syndy usynystardyń jan-jaqty strategıasy joq dep alańdaıdy.

Bir kún buryn AQSH prezıdenttigine respýblıkalyq partıadan úmitker Donald Tramp Zelenskııge mysqylmen ony planetanyń eń uly kásipkeri dep atady. 

"Ýkraına joq. Bul endi Ýkraına emes. Úıler qırady, qalalar joıyldy. Olar endi joq. Biz kelissózderden bas tartqan Zelenskııge mıllıondaǵan dollar berýdi jalǵastyryp jatyrmyz. Ol bizdiń elge kelgen saıyn 60 mıllıard dollar alyp qaıtady", – dedi Tramp.

Buryn da Tramp Ýkraınanyń "joıylǵany" jáne soǵys kezinde "mıllıondaǵan" adam qaza tapqany týraly osyndaı málimdemelerdi birneshe ret aıtqan.

Zelenskııdiń Vashıngtondaǵy jeke kezdesýleri árqashan sátti bolmaıdy. Ótken jyldyń jeltoqsanynda buryn bólingen qarajat jumsalyp, amerıkalyq áskerı tehnıkalar berilmeı, Zelenskıı bos qaıtty.

Tramp Reseı áskeriniń myqtylyǵyn atap ótti.

"Baıden "Jeńgenshe ketpeımiz" deıdi. Biraq Reseı jeńip ketse ne bolady? Olar soǵysyp úırenip qalǵan. Olar Gıtlerdi jeńdi, Napoleondy jeńdi. Olar únemi soǵysady. Jáne bul óte jaman", – dedi Tramp.

Donald Tramp taǵy Zelenskıımen kezdesýge nıetti ekenin málimdedi.

Zelenskııdiń Amerıka Qurama Shtattaryna sapary aldynda onyń Baıden, Harrıs jáne Tramppen kezdesetini belgili boldy. Baıden jáne Harrıspen kezdesýler ótti, biraq Tramppen kezdespedi.

Zelenskııdiń AQSH-qa sapary kezinde onyń respýblıkalyq partıa basshylyǵymen qarym-qatynasyn kúrt buzǵan janjal shyqty.

Ókilder palatasynyń spıkeri respýblıkashyl Maık Djonson Zelenskııden Ýkraınanyń AQSH-taǵy elshisi Oksana Markarovany shyǵarýdy qatań talap etti.

Djonsonnyń aıtýynsha, ol Zelenskııdiń Pensılvanıa shtatynda Skranton qalasyndaǵy oq-dári zaýytyna barǵan, bul – respýblıkashyl spıkerdiń aıtýynsha, AQSH-taǵy saılaý naýqanyna aralasý.

"Men sizden Ýkraınanyń AQSH-taǵy elshisi Oksana Markarovany dereý jumystan bosatýyńyzdy talap etemin", – dep jazdy spıker.

Osy aptanyń basynda Zelenskıı Skrantondaǵy ýkraınalyq áskerge qajet 155 mm kalıbrli snarádtarǵa arnalǵan metal qaptamalardy shyǵaratyn áskerı zaýytqa bardy.

Skranton – prezıdent Djo Baıdenniń týǵan qalasy, al Pensılvanıa qarashadaǵy prezıdenttik saılaýdy sheshetin negizgi shtattardyń biri.

Kóptegen respýblıkashylar Zelenskııdiń saparyn demokrattar úshin saılaý naýqany jáne saılaýǵa aralasý retinde qabyldady. Ýkraına prezıdentiniń ózi Ýkraına úshin ómirlik mańyzy bar oq-dári shyǵaratyn adamdarǵa alǵys aıtqysy keletinin aıtty.