Vedomstvo mlmetine qaraǵanda, Reseı áskeri Ýkraınanyń Donesk oblysy Pokrovsk aýdany Nıkolaevka jáne Sýhoı Iar aýyldaryna jaqyn mańda 16 ýkraın tutqynyn atyp óltirgen.

Telegram-arnada taraǵan vıdeoda tutqynǵa alynǵan ýkraın jaýyngerleriniń ormannan ashyqtaý jerge shyqqany kórinedi. Olar sapqa turǵannan keıin Reseı áskeri olarǵa oq jaýdyrady.

Halyqaralyq gýmanıtarlyq quqyqqa sáıkes, tutqynǵa berilgen adamdardy atý áskerı qylmys bolyp sanalady. 

"Bul maıdan shebinde Ýkraına áskerin darǵa asqan oqıǵalardyń eń irisi. Bul tutqyndardy óltirý men azaptaý kezdeısoqtyq emes, áskerı-saıası basshylyqtyń qasaqana saıasaty ekendiginiń taǵy bir dáleli" dedi Ýkraınanyń bas prokýrory Andreı Kostın.

Ýkraına Joǵarǵy radasynyń adam quqyǵy jónindegi ýákili Dmıtrıı Lýbınes BUU men halyqaralyq Qyzyl kres uıymyna áskerı tutqyndarmen qarym-qatynas týraly Jeneva konvensıasynyń buzylýyna baılanysty shaǵym túsirgenin habarlady.

Qyrkúıek aıynda CNN telearnasy tutqynǵa berilgen ýkraın jaýyngerlerin Reseı áskeriniń óltirip jatqany týraly eki vıdeo jarıalaǵan. Vıdeo dronnan túsirgen, Ýkraınanyń barlaý qyzmeti vıdeony CNN arnasyna jiberip, soldatty óltirý týraly buıryqtyń aýdıomátinin bergen.

Ýkraına bas prokýrory CNN arnasyna vedomstvo soǵys bastalǵaly beri keminde 28 ýkraınalyq tutqynnyń qazasyn tergep jatqanyn habarlaǵan.

Reseı mundaı aıyptaýlarǵa túsinikteme bermeıdi.

Jýyrda BUU adam quqyǵy jónindegi baqylaý mısıasy kezekti esebin jarıalap, ýkraın tutqyndaryn qorlaý júıeli túrde bolyp turatynyn aıtqan.

Baıandama avtorlary azaptaý nátıjesinde nemese medısınalyq kómek berilmegendikten on ýkraın tutqynynyń qaza bolǵanyn tirkegen. Esepte ýkraın tutqyndaryn uryp-soǵý, elektr toǵyna soqtyrý, tunshyqtyrý, uıyqtatpaý, atý ımıtasıasy, ar-namysyna tıý, otbasyna kúsh kórsetetini týraly qoqan-loqy jasaý sıaqty "ádister" jıi kezdesetini aıtylady.