Jýrnalıs mınıstrge "Ekonomıser aldaǵy eki jylda Qazaqstanda 3 iri daǵdarys bolady dep boljap otyr. Olar – búdjet daǵdarysy, ımporttyń artýy, qaryz daǵdarysy. Munyń bárine aqsha jetpeýi múmkin. Sondyqtan teńge quldyrap, ulttyq qor sarqylyp, ınvestısıa aǵyny azaıýy múmkin. Buǵan Qazaqstan daıyn ba?" dep suraq qoıdy.

Premer-mınıstrdiń orynbasary – Ulttyq ekonomıka mınıstri Nurlan Baıbazarov aqparattyń jalǵan ekenin aıtty.

- Meniń oıymsha, bul durys aqparat emes. Eshqandaı ımport pen eksporttyń daǵdarysy bolmaıdy. Biz Ulttyq bankpen birigip jasaǵan boljam jasaǵanbyz. Ondaǵy sıfrlarǵa men qarap otyrmyn. Bizdiń saýda balansymyz aldaǵy 5 jylda tek oń deńgeıde bolady. Kórsetkish 20 mlrd dollardan asady.  Eksporttyń ımporttan kólemi 20 mlrd dollardan kem bolmaıdy. Bul - aldaǵy 5 jyldy. Sondyqtan muny negizsiz aqparat dep oılaımyn. Oǵan senbeńizder. Biz eshqandaı daǵdarysty boljap otyrǵan joqpyz. Maqsatymyz ekonomıkany 6%-dan asyrý. Oǵan búkil derlik múmkindik bar. Ol úshin tek jumys isteý kerek. Biz ekonomıkalyq ósimdi ǵana kútemiz. Eshqandaı daǵdarys bolmaıdy, - dedi Baıbazarov úkimettiń baspasóz ortalyǵynda ótken brıfıńte.