Balaly otbasylarǵa qandaı áleýmettik qoldaý kórsetiledi:

- júktilik pen bosaný boıynsha áleýmettik tólem;

- bala týǵanda tólem;

- bala bir jarym jasqa tolǵanǵa deıin onyń kútimi boıynsha járdemaqy;

- múgedektigi bar bala tárbıelep otyrǵan ata-analarǵa arnalǵan járdemaqy.

Úkimet basshysy Oljas Bektenov Májilis depýtattarynyń saýalyna bergen jaýabynda elimizde kópbalaly otbasylarǵa kórsetiletin qoldaý júıesi jaıly túsindirip berdi.

Bıyl respýblıkalyq búdjetten memlekettik járdemaqylardyń 5 túrin jáne Memlekettik áleýmettik saqtandyrý qorynan áleýmettik tólemniń 2 túrin tóleýge 1,5 trln teńge qarajat bólindi. Bıyl 1 qazandaǵy jaǵdaı boıynsha bul tólemderdi 2,3 mln astam adam aldy, bul ótken jyldyń osyndaı kezeńimen salystyrǵanda 10,5%-ǵa joǵary. Osylaısha, memlekettiń azamattar aldyndaǵy áleýmettik mindettemeleri jyl saıyn ósip keledi, - delingen resmı jaýapta.

Sondaı-aq kópbalaly otbasylarǵa áleýmettik qoldaý kórsetý maqsatynda memlekettik járdemaqy otbasyndaǵy balalar sanyna qaraı saralanǵan mólsherde tólenedi.

Olar:

- 4 balasy bar otbasylarǵa – 59 183 teńge;

- 5 balasy bar – 73 988 teńge;

- 6 balasy bar – 88 793 teńge;

- 7 balasy bar – 103 598 teńge;

8 jáne odan da kóp balalary bar otbasy úshin – ár balaǵa 14768 teńgeden qosylady.

Budan basqa, bes jáne odan da kóp balasy bar otbasylar (2020 jyly – 8,4%, 2024 jyly – 9,8%) úlesi men nagradtalǵan analar sanynyń (2020 jyly – 232 320 adam, 2024 jyly – 237 636 adam) sońǵy 5 jylda ósken. Bul qoldanystaǵy áleýmettik qorǵaý júıesiniń tıimdiligin bildiredi.