Buǵan deıin Atyraý qalasynyń №2 soty Rınat Ibragımovty materıaldyq táýeldilikte bolǵan adamǵa qatysty densaýlyqqa qasaqana aýyrlyǵy ortasha zıan keltirgeni úshin kináli dep tanyp, qylmystyq kodekstiń 107-baby 2-bóliginiń 3-tarmaǵymen 2 jyl merzimge bas bostandyǵyn shektedi.

Keıin appelásıalyq sotta is qaıta qaralyp, shendiniń áreketi qaıta saralanypty. Nátıjesinde oǵan shyqqan úkim ózgerdi. Azamat shartty túrde jazasyn ótemeı, 2 415 000 teńge kóleminde aıyppul tóleıdi.

Alqa «kináli adamǵa kórineý belgili materıaldyq jaǵynan táýeldi adamǵa qatysty» saralaý belgisi durys taǵylmaǵan dep sheshti. Jábirlenýshiniń sottalǵanǵa materıaldyq táýeldiligi týraly dálel usynylmady. Jábirlenýshiniń kásipkerlik qyzmetti júzege asyrǵany, onyń shotyna aqsha túskeni týraly qujattar usynyldy. Osyǵan baılanysty I.-diń áreketi QK-tiń 107-babynyń 1-bóligine qaıta saralandy. Oǵan 700 aılyq eseptik kórsetkish mólsherinde aıyppul jazasy taǵaıyndaldy, - deıdi Atyraý oblystyq sotynyń baspasóz qyzmeti.

Aıta ketsek, Rınat Ibragımov 2008 jylǵy Azıa chempıonatynyń dzúdodan kúmis júldegeri. Eńbek jolyn sport mektebinde jattyqtyrýshy bolyp bastaǵan ol 2017-2022 jyldar aralyǵynda qalalyq jáne oblystyq sport bólimi men basqarmasynda basshy boldy. 2022 jyldan 2024 jylǵa deıin Atyraý oblysy Maqat aýdanynyń ákimi laýazymyn atqardy. 

Osydan jarty jyl buryn burynǵy áıeli jyldar boıy turmystyq zorlyq-zombylyq kórip kelgenin aıtyp shaǵymdanyp, jelige beınejazba jarıalady. Balalaryn da tartyp alyp, kórsetpeıtinin aıtty. Sol sebepti jaýaptylardan oǵan tıisti shara qoldanylýyn surady.