«Budan bylaı memlekettik organ únemdelgen qarjyny syıaqyǵa bóle almaıdy. Bul qarjy búdjetke qaıtarylady», – dedi Qarjy mınıstri.

Memlekettik organ qyzmetkerleriniń syıaqysy qalaı tólenetini jóninde  Ulttyq ekonomıka mınıstrligi KursivMedia-ǵa egjeı-tekjeıli aqparat bergen edi. Oǵan qaraǵanda, memlekettik qyzmetshilerge syılyqaqy tóleýge arnaıy qarajat josparlanbaıdy. Organnyń qajettilikterinen únemdelgen qarjy syıaqy retinde bólinip kelgen. Iaǵnı bul másele basshylardyń quzyretinde edi.

Quzyrly organnyń aıtýynsha, syıaqy beriletin kezde, qyzmetshiniń jumys nátıjesi, mindetterin tyńǵylyqty oryndaýy, erekshe, qıyn tapsyrmalardy buljytpaı oryndaý jáne ózge de jetistigi eskeriledi eken.

Syıaqynyń nege qysqarǵanynyń sebebi, árıne, búdjet tapshylyǵy. Mádı Takıev ol jóninde de málimet berdi.

Onyń sózine qaraǵanda, búgingi kúni ıgerilmeı qalǵan qomaqty qarajat joq. Óıtkeni bıylǵy jyl onsyz da qaýyrt bolǵan. Búdjetke on márte túzetý engizgen.

«Búdjet aldyńǵy jylǵy kórsetkishterdi eskere otyryp josparlanady. Ýkraına men Reseı arasyndaǵy soǵysqa, geosaıası ahýalǵa baılanysty tabys 143%-ǵa ósti. Osy kórsetkish odan keıingi jyldarǵa yqpal etti. Biraq keıin ondaı tabys bolmady», – dedi mınıstr.

Mádı Takıev mınıstrliktiń tapqanynan, jumsaǵan qarjysy kóp ekenin moıyndady. Onyń sózine qaraǵanda, sońǵy tórt jylda ústeme tabys 4 trln bolsa, shyǵyn 9 trln-ǵa ósken.