AQSH qarjy mınıstrligi Reseıge ozyq tehnologıalar men jabdyqtar jetkizýge qatysy bar 275 tulǵa men uıymǵa qarsy sanksıa saldy. Olardyń qatarynda qazaqstandyq Kazstanex kompanıasy da bar. Ol búkil álemdegi óndirýshilerden bildekterdi (stanok) jetkizedi.

Egov.kz málimetterine sensek, kompanıa 2014 jyly tirkelgen. Onyń negizin qalaýshy jáne birinshi dırektory – Vasılıı Abramov.

AQSH-tyń Qarjy mınıstrligi reseılik qorǵanys kompanıalaryna jabdyqtar men elektronıka jınaýǵa kómektesken Reseı, Qytaı, Úndistan, Shveısarıa, Taıland jáne Túrkıa sıaqty elderdegi zańdy tulǵalarǵa sanksıalar engizdi. Bul kompanıalardyń keıbiri qarý-jaraq pen oq-dári jetkizip, Reseıdiń qorǵanys ónerkásibine qajetti ónimderge tapsyrys bergen.

Sanksıa tiziminde Reseı, Belarýs, Qytaı, Úndistan, Túrkıa azamattary da bar. Olardyń arasynda Reseı qorǵanys mınıstriniń orynbasarlary Aleksandr Fomın, Pavel Fradkov jáne Vladımır Pýtınniń týysy dep aıtylatyn Anna Sıvıleva da bar.