Kólik, jol máselesi talqylanǵan májilis otyrysynda depýtat Edil Jańbyrshın Air Astana áýe kompanıasyndaǵy baǵa saıasatyn synǵa alyp, kompanıa basshysy Pıter Fosterge ashýyn tókti. 

Edil Jańbyrshın ushý kúni jaqyndaǵan saıyn bılet qunynyń ósetinine narazylyq bildirdi. Onyń ústine birneshe aıdan beri reıs keshikkeni úshin beriletin ótemaqyny áli ala almaǵan eken. 

“Shynynda da Air Astana bizdiń aspanymyzdyń qudaıy bolyp alǵan. Bılettiń bári jaqyndaǵanda kóteriledi. Ol araqashyqtyqqa baılanysty degen bos áńgime. Bılet jaqyndaǵanda qalaı kóteriledi? Jaqyndaǵan kezde kóterilmeýi kerek, baǵasy túsýi tıis. Óıtkeni bıletti tezirek ótkizý kerek qoı. Bular kerisinshe jumys isteıdi. Air Astana, loýkoster máselesin maıshammen qaraý kerek. Foster myrza (Air Astana kompanıasynyń basshysy), siz shańyraqqa qarańyz. Siz osy memlekettiń zańyna baǵynýyńyz qajet. Musabaev ekeýimiz (Májilis depýtaty Samat Musabaev) 1 saǵat keshikkenge 3 paıyz aıyppul salatyn norma engizdik. Endi qyzyqty qarańyzdar, 2 tamyzda Air Astana 12 saǵatqa keshikti, áli kúnge deıin aıyppulyn ala almaı júrmin. Nege? Olar qıturqy syzba ázirlep qoıǵan. Saıtqa kirip ótinim berip, aqshany alý qıyn. Men áli júrmin. Ony alamyn da. Al endi alatyn bolsańyz, "jazbalaryńyzdy, aqshańyzdy eshkimge jarıalamaý kerek" dep shart qoıady”, – dedi depýtat.

Osy oraıda ol Kólik mınıstri Marat Qarabaevqa ótemaqylardy alýdy jeńildetý qajettigin aıtty. Depýtattyń atap ótýinshe, áýe kompanıa saıtynan ótemaqyǵa ótinim berý óte qıyn.

“Air Astana-nyń mýltımedıasynyń kóbi basqa tilde. Memlekettik tildegi kontent óte az. Ony ornyna keltirý qajet. Ol da úlken másele. Keńistigimizde ushyp júr, ózimizdiń kompanıa sanaımyz. Endeshe nege memlekettik tilge basymdyq bermeıdi?! Foster myrza, siz Parlamentke birinshi ret kelip otyrsyz. Sizge bir ret qana suraq qoıyldy. Biraq, siz Qazaqstan aýmaǵyna kelgennen keıin birinshi kezekte Qazaqstan azamattarynyń múddesin qorǵaýyńyz, zańyn syılaýyńyz, jaǵdaı jasaýyńyz qajet. Aqshany bárimiz de jaqsy kóretin shyǵarmyz. Biraq, aqshany jaqsy kóremin dep bıletti kótere bermeńiz. Kúnde jalaqy kóterilip, kúnde otyn baǵasy qymbattap jatqan joq. Terıtorıamyzdyń araqashyqtyǵy kúnde rezeńke uqsap sozylyp jatqan joq. Al sizder baǵany kóteresizder. Bılet baǵasy 60 myńnan 120 myńǵa deıin ketip qalady”, – dedi Edil Jańbyrshın.

Jıyn barysynda Jańbyrshın Pıter Fosterge kúlip otyrǵany úshin narazylyǵyn aıtty. 

“Siz kúlmeńiz. Siz bizdi mensinbeı otyrsyz. Biz sizge Afrıkadaǵy aborıgen emespiz. Eshteńeni túsinbeıtin! Oınamańyz, bizdi kúlip mensinbeı. Bul Parlament! Osy jerde otyrǵandardyń bári – halyq saılaǵan adamdar”, – dedi ol.