2025 jylǵy 1 qańtardan bastap elimizde jumys berýshiniń mindetti zeınetaqy jarnasynyń mólsheri ósti. 2024 jyly jarna mólsheri 1,5% edi, bıyl 2,5% boldy. 

Eske salaıyq, 2024 jyldyń 1 qańtarynan bastap barlyq jumys berýshi zeınetaqy jınaqtaryn qalyptastyrýǵa qatysyp, BJZQ-ǵa jumys berýshiniń mindetti zeınetaqy jarnasyn (JMZJ) óz qyzmetkerleriniń paıdasyna aýdara bastady. Osylaısha, Qazaqstannyń jınaqtaýshy júıesi jańa quramdaýysh bólikpen tolyqtyryldy.

“Áleýmettik kodekske sáıkes, qyzmetkerler óz kiristerinen tóleıtin 10% mindetti zeınetaqy jarnalarynan aıyrmashylyǵy – jumys berýshiniń mindetti zeınetaqy jarnasyn jumys berýshi óz qarajaty esebinen aýdarady. Jyl saıyn JMZJ mólsheri kezeń-kezeńimen ósip otyrady (2024 jyly 1,5%, 2025 jyly 2,5%, 2026 jyly 3,5%, 2027 jyly 4,5%) jáne 2028 jyly 5% jetedi. Jumys berýshiniń JMZJ esepteý úshin qabyldaıtyn jumyskerdiń tabys somasy tıisti kúntizbelik jylǵa belgilengen eń tómengi jalaqynyń (ETJ) kem degende bireýin jáne kóp degende 50 eselengen mólsherinen aspaýǵa tıis”, – dep málimdedi "BJZQ" AQ baspasóz qyzmeti.

Jumys berýshiler zeınet jasyndaǵy, 1 jáne 2-toptaǵy merzimsiz múgedektigi bar, áskerı qyzmetkerler men olarǵa teńestirilgen adamdar, sondaı-aq 1975 jyldyń 1 qańtaryna deıin týǵan adamdardyń paıdasyna JMZJ tóleýden bosatyldy. Qarjy mınıstrliginiń Memlekettik kirister komıteti jumys berýshilerdiń JMZJ-ny ýaqytyly jáne tolyq tólep otyrýyn baqylaıdy.