Senat depýtaty jáne burynǵy ishki ister mınıstriniń birinshi orynbasary Marat Qojaev Almatydaǵy kafelerdiń birinde sheteldik stýdentterdiń jappaı tóbelesine qatysty pikir bildirdi.

Tóbelestiń beınejazbasy áleýmettik jelide taraldy. Jazbada birneshe jigittiń bir-birin uryp-soǵyp, oryndyqtardy, taıaqtardy, tipti ústelderdi qoldanǵany kórinedi.

Marat Qojaevtyń aıtýynsha, stýdentterdi elden shyǵarý týraly sheshim zań talaptaryna sáıkes qabyldanǵan.

"Bizdiń elimizde júrgen kez kelgen sheteldik azamat bizdiń zańdarymyzdy, tártipterimizdi, dástúrlerimizdi, ádet-ǵuryptarymyzdy qurmetteýi jáne eń bastysy, ózin qalaı ustaý kerektigin bilýi kerek. Bul – búkil álemge ortaq tájirıbe. Basqa elge barǵanda, sol eldiń zańdaryn saqtaýǵa tyrysasyz", – dedi Qojaev Senat dálizinde.

Sondaı-aq senator zańdy buzǵan sheteldikterdiń Qazaqstanǵa 5 jyl boıy orala almaıtynyn aıtty.

"Bul jaǵdaıda qoǵamdyq orynda bir-birine dene jaraqatyn salýǵa jaqyn zańdy óreskel buzý áreketi boldy. Sondyqtan zańymyz osyndaı jaǵdaılarda sheteldikterdi elden shyǵarýdy talap etedi. Olardyń Qazaqstanda bilim alýǵa baılanysty qujattary joıylady", – dep qosty ol.