Týystary men áriptesteri Almatydaǵy janjal kezinde qaza tapqan polıseı týraly aıtyp berdi.

Polıseı Nursultan Nesipbaev Almatydaǵy túngi nysandardyń birinde áıelge arasha túsken. Áıeldiń janyndaǵy er adam ony moınynan ustap, tunshyqtyra bastaǵan. Tóbeles barysynda Nursultan Nesipbaev ishinen jáne júrek tusynan pyshaq jaraqatyn alǵan. 31 jastaǵy polısıa qyzmetkeriniń artynda áıeli men tórt balasy qalǵan: eki qyzy jáne eki uly. Keshe týystary Nursultanmen qoshtasty. Ol týǵan jeri Baıqońyrda jerlendi.

"Joldasym balalarymyzǵa qamqor áke, maǵan adal jar boldy. Ol otbasymyz úshin bárin jasady. Ol óz jumysyn jan-tánimen súıetin jáne oǵan berilgen jan edi. Biz úlken josparlar quryp edik. Biraq taǵdyry basqasha boldy," – dep bólisti marqumnyń jubaıy Baqyt Jetigen.

"Ulym adal boldy, óz qyzmetin abyroımen atqardy. Ol árqashan kómekke daıyn turatyn. Óz jumysyn jáne otbasyn qatty jaqsy kóretin. Balalary ákesiz qaldy. Ol áıeldi qorǵaǵysy kelip edi, osyndaı jaǵdaı boldy," – dep qosty marqumnyń anasy.

Qaıtys bolǵan quqyq qorǵaýshy Baıqońyrda týyp-ósken. Ol zań fakúltetin bitirip, quqyq qorǵaý organdarynda 10 jyl jumys istegen. Almaty Medeý aýdany polısıa basqarmasynda jedel ýákil qyzmetin atqarǵan.

"Ol meniń jetekshim bolǵan: jedel qyzmettiń qyr-syryn úıretti. Biz birge kóptegen qylmysty ashtyq. Nursultan óz otanynyń naǵyz patrıoty boldy. Óz jumysynyń jankúıeri edi. Ádildik úshin árdaıym kúresetin. Biz úshin bul – úlken qaıǵy. Týystaryna kóńil aıtamyn," – dedi Medeý aýdany PB-nyń aǵa jedel ýákili Rústem Ǵalymov.

Qylmysker týraly málimet az. Ol 41 jastaǵy Ózbekstan azamaty. Er adam qylmys bolǵan jerde ustaldy. Qazir ol ýaqytsha ustaý ızolátorynda.