Prezıdent janyndaǵy Áıelder isteri jáne otbasylyq-demografıalyq saıasat jónindegi Ulttyq komısıa múshelerini ata-analar qaýymdastyǵyna úndeý jarıalady.

Qurmetti ata-analar! 19 qańtarda Astanada bizdi bárimizdi tereń qaıǵyǵa batyryp, eseńgiretken qaıǵyly oqıǵa boldy. Onlaın oıyndarǵa táýeldilik týraly eskertý jasaǵan kezde týyndaǵan janjal saldarynan jaqyn týysynyń qolynan bir adam qaza taýyp, úsheýi jaraqat aldy. Oqıǵa mán-jaıy áli anyqtalýda. Biz qaıǵyly jaǵdaıǵa tap bolǵan adamnyń týystary men jaqyndaryna jáne osy tragedıadan zardap shekken barlyq adamdarǵa tereń qaıǵyryp, kóńil aıtamyz. Bul jaǵdaı bizge balalarymyzdyń qyzyǵýshylyqtaryna jáne hobbılerine qanshalyqty nazar aýdarý qajettigin kórsetedi. Búgingi kúni sıfrlyq tehnologıalar ómirimizdiń bólinbes bóligine aınaldy. Jastar, ásirese jasóspirimder, ýaqyttyń kóp bóligin vırtýaldy álemde ótkizýde. «Kazakhstan Kids Online» zertteýine sáıkes, Qazaqstandaǵy balalardyń 15%-y kúndelikti ınternette teris kontentke kezigýde. Vıdeoıgrlerge, áleýmettik jelilerge jáne onlaın qarym-qatynasqa táýeldilik artyp keledi. Bul, óz kezeginde, áleýmettik oqshaýlanýǵa, otbasyndaǵy túsinbeýshilik pen janjaldarǵa ákeledi, - delingen úndeýde.

Ulttyq komısıa balalardyń qyzyǵýshylyqtary men problemalaryna kóbirek nazar aýdarýǵa shaqyrady. 

Balalaryńyzdyń ómirine qatysý, olardyń hobbılerine shynaıy qyzyǵýshylyqpen qarap, ashyq áńgimeler júrgizý – olardyń úılesimdi damýy men múmkin bolatyn tragedıalardyń aldyn alýdyń negizi. Sonymen qatar, biz ata-analarǵa «ata-ana baqylaýy» quraldaryn paıdalanyp, balalardyń ınternette ótkizetin ýaqyty men tutynatyn kontenti týraly aqparat alýdy usynamyz. Bul balalardy artyq gadjettermen shuǵyldanýdan, destrýktıvti oıyndardan qorǵaýǵa jáne kıberqaterlermen baılanysty qaýipterdi azaıtýǵa kómektesedi. Kıberqaýipsizdikke qamqorlyq jasaý – otbasynyń ál-aýqatynyń mańyzdy bóligine aınalýda. Qazirgi ýaqyttaǵy jaǵdaılar ata-analarmen balalarynyń arasyndaǵy qarym-qatynasqa az ýaqyt qaldyrady. Alaıda eshqandaı jumys balalardyń ómiri men densaýlyǵynan mańyzdy bola almaıdy. Otbasynda senimdi atmosfera quryp, balalardyń qaýipsizdigin baqylap, eń bastysy – BALALARYŃYZǴA ÚLGİ BOLYŃYZDAR! Bul tragedıa biz úshin taǵy bir sabaq bolar jáne ózimizdiń basymdyqtarymyzdy qaıta qaraýymyzǵa sebep bolady. Tek otbasy, memleket jáne qoǵamnyń birlesken kúsh-jigeri arqyly ǵana biz balalarymyz úshin qaýipsiz ári gúldengen bolashaq qura alamyz. Balalarymyz bizben birge bolsyn! - deıdi komısıa músheleri.